Самарқанд вилоятидаги туманлардан бирининг уй-жой коммунал хизмат кўрсатиш бўлими бошлиғи ерни ноқонуний сотиш учун пул олаётганида ушланди. Бу ҳақда «Дарё»га ДХХ матбуот хизмати хабар берди.
Маълум қилинишича, у хизмат мавқейидан фойдаланиб, 1975 йилда туғилган фуқаро билан келишган ҳолда ўзганинг ишончига кириб, унга туман тиббиёт бирлашмасининг фойдаланилмаётган омборхона биносини олиб беришни ваъда қилган. Эвазига 10 минг доллар сўраган.
ДХХнинг Самарқанд вилояти бўйича бошқармаси ходимлари томонидан департаментнинг ҳудудий бошқармаси ходимлари билан ҳамкорликда ўтказилган тезкор тадбирда, улар олдиндан 5 минг доллар олган вақтида ушланган.
Ҳозирда мазкур ҳолат юзасидан Жиноят кодексининг тегишли моддаси билан жиноят ишлари қўзғатилиб, тергов ҳаракатлари олиб борилмоқда.
Бундан аввал ДХХ ходимларининг Иқтисодий жиноятларга қарши курашиш департаментининг Тошкент вилояти бўйича бошқармаси ходимлари билан ҳамкорликда ўтказган тезкор тадбирида 13,7 гектар ерни 3 миллион 425 минг долларга сотмоқчи бўлган инвестициялар ва ташқи савдо бошқармаси ходими ва унинг шериги ушланганди.
Изоҳ (0)