Samarqand viloyatidagi tumanlardan birining uy-joy kommunal xizmat ko‘rsatish bo‘limi boshlig‘i yerni noqonuniy sotish uchun pul olayotganida ushlandi. Bu haqda “Daryo”ga DXX matbuot xizmati xabar berdi.

Ma’lum qilinishicha, u xizmat mavqeyidan foydalanib, 1975-yilda tug‘ilgan fuqaro bilan kelishgan holda o‘zganing ishonchiga kirib, unga tuman tibbiyot birlashmasining foydalanilmayotgan omborxona binosini olib berishni va’da qilgan. Evaziga 10 ming dollar so‘ragan.

DXXning Samarqand viloyati bo‘yicha boshqarmasi xodimlari tomonidan departamentning hududiy boshqarmasi xodimlari bilan hamkorlikda o‘tkazilgan tezkor tadbirda, ular oldindan 5 ming dollar olgan vaqtida ushlangan.

Hozirda mazkur holat yuzasidan Jinoyat kodeksining tegishli moddasi bilan jinoyat ishlari qo‘zg‘atilib, tergov harakatlari olib borilmoqda.

Bundan avval DXX xodimlarining Iqtisodiy jinoyatlarga qarshi kurashish departamentining Toshkent viloyati bo‘yicha boshqarmasi xodimlari bilan hamkorlikda o‘tkazgan tezkor tadbirida 13,7 gektar yerni 3 million 425 ming dollarga sotmoqchi bo‘lgan investitsiyalar va tashqi savdo boshqarmasi xodimi va uning sherigi ushlangandi.