Филиппинга ёпирилган Раи тайфуни оқибатида ҳалок бўлганлар сони 200 кишидан ошди
Филиппинда кузатилган Раи тайфуни оқибатида ҳалок бўлганлар сони 208 кишига, бедарак йўқолганлар сони эса 52 кишига етди. Шунингдек, камида 239 киши жароҳат олган. Бу ҳақда Reuters агентлигига таяниб, «РБК» хабар берди.
19 декабрь куни табиий офат қурбонлари сони 75 кишига етгани айтилганди. Кейинроқ маҳаллий Манила Буллетин газетаси ҳалок бўлганлар сони 169 нафарни ташкил этаётгани ҳақида ёзди. Энг кўп қурбонлар Марказий Висайи вилоятида қайд этилган — у ерда 129 киши ҳалок бўлган ва 100 дан ортиқ одам жароҳат олган. Ғарбий Висайида эса 22 киши ҳалок бўлган. Қолган қурбонлар — мамлакатнинг бошқа уч вилоятидан.
Бохол оролидаги вилоят губернатори Артур Яп энг кўп жабр кўрган ҳудудларга ҳарбийлар, полициячилар, қирғоқ қўриқлов ва ўт ўчириш хизматлари ходимлари юборилганини маълум қилди. Филиппин Ҳарбий-денгиз кучлари кемаси гуманитар ёрдам билан Бохолга йўл олган.
Раи тайфуни Тинч океанининг ғарбий қисмида шаклланган. Шарқий Висайи расмийлари табиий офатга қадар 82 мингдан ортиқ одамни эвакуация қилган.
Эслатиб ўтамиз, Филиппинда апрель ойида Суригай тайфуни содир бўлиб, 60 минг киши эвакуация қилинганди. Ўшанда шамол тезлиги 195 километр соатга етиб, уйларнинг томини вайрон қилган ва дарахтларни қўпориб ташлаган.
