Ўзбекистон мусулмонлари идораси раиси, муфтий Нуриддин Холиқназаров ва Дин ишлари бўйича қўмита раиси Содиқжон Тошбоев бошчилигидаги делегация Умра сафарини ҳал этиш учун 1 декабрь куни Саудия Арабистонига жўнаб кетганди. Идора матбуот хизмати 9 декабрь куни якунланган ушбу хизмат сафари натижаларини эълон қилди.
Қайд этилишича, делегация бутун дунёда қўлланилаётган карантин чекловлари шароитида Умра сафарини ташкил қилиш бўйича подшоҳлик муассасалари билан музокаралар олиб борди. COVID пандемияси бошланишидан аввал Умра сафари учун пул тўлаб, навбатда турганлар ва бошқа фуқаролар учун ушбу зиёратни амалга ошириш имкониятлари яқин фурсатларда яратилади.
Карантин тартибларига мувофиқ меҳмонхоналарда зиёратчиларнинг хоналарга, автобусларда ўриндиқларга жойлаштиришда оралиқ масофа ҳисобига 50 фоизгача қисқартирилиш, озиқ-овқат маҳсулотларини қадоқланган ҳолда тарқатиш, ўрнатилган бошқа карантин тартиб-қоидаларга риоя этиш унчалик катта бўлмаган миқдорда қўшимча маблағларни талаб этиши мумкин.
«Умра зиёратлари муддатлари, қўшимча тўлов миқдори, вакцинация тўғрисидаги маълумотлар тез орада маълум қилинади», — дейилади Ўзбекистон мусулмонлари идораси хабарида.
Эслатиб ўтамиз, Саудия Арабистони ҳукумати чет элликлар кичик ҳаж — Умра зиёратини амалга ошириш учун 10 августдан қиролликка кириши мумкинлигини эълон қилган эди.
Зиёратчилар қиролликда тасдиқланган Pfizer, Moderna, Johnson & Johnson, AstraZeneca вакциналаридан бири билан эмланган бўлиши ёки манфий жавобли ПЗР-тестни тақдим этиши керак. Вакцина олмаган зиёратчилар мамлакатга келганидан кейин уч кунлик карантиндан ўтиб, сўнг коронавирусга нисбатан қайтадан ПЗР-тест топширади.
Саудия Арабистони ҳукумати Хитой вакциналарини ҳам тан олади, аммо тўлиқ эмлангандан кейин Pfizer, Moderna, Johnson & Johnson ёки AstraZeneca вакцинаси билан бустер дозасини (вакцинациядан олти ой ўтиб киритиладиган қўшимча доза) олиши керак бўлади.
Изоҳ (0)