Андижонда блогер аёлни калтаклагани айтилган туман электр тармоқлари бош ҳисобчисига жиноят иши қўзғатилди. Бу ҳақда «Дарё» сўровига асосан Бош прокуратура ахборот хизмати раҳбари Ҳаёт Шамсутдинов маълум қилди.
22 ноябрь куни блогер Фотима Жўраева ўзининг Facebook саҳифасида Андижон вилояти Улуғнор тумани электор тармоқлари корхонаси бош ҳисобчиси томонидан калтакланганини айтиб, мурожаат қилганди. У ўз мурожаатида туман электр тармоқлари корхонаси бош ҳисобчисидан ўзи ҳуқуқшунос сифатида ишлаб келаётган фермер хўжалигига электр энергиясидан қарздорлик сунъий равишда оширилгани бўйича тегишли ҳужжатларни беришини талаб қилганини, корхона бош ҳисобчиси эса унга қўпол муносабатда бўлиб, уни ҳақорат қилиб, юзига ургани ва қўл телефонини синдириб юборганини айтиб, айбдор корхона ходимларига нисбатан қонуний чора кўришни сўраган.
«Андижон ҳудудий электр тармоқлари» эса аксинча, аёлнинг ўзи жанжал чиқаришга уринганини билдириб, унинг калтакланганини рад этган.
Шундан сўнг туман ИИБ томонидан терговга қадар текширув ҳаракатлари олиб борилди. Олиб борилган терговга қадар текшириш якунига кўра, Улуғнор тумани Электр тармоқлари корхонаси бош ҳисобчиси С.М.га нисбатан Улуғнор тумани ИИБ ҳузуридаги Тергов бўлинмаси томонидан Жиноят кодексининг 109-моддаси 2-қисми (қасддан баданга енгил шикаст етказиш) аломатлари билан жиноят иши қўзғатилган ва Фотима Жўраева жиноят ишида жабрланувчи деб эътироф этилган.
Ўтказилган суд-тиббий экспертизасининг 25 ноябрдаги хулосасига кўра, Фотима Жўраевада бош мия чайқалиши, бошнинг чап қовоқ соҳаси ёрилгани (тикилган, лат яра), чап елка, бел, қорин ва думба соҳаси юмшоқ тўқималарининг лат ейиши ва қонталашлар каби жароҳатлар унинг саломатлигининг қисқа муддатга бузилишига сабаб бўлган тан жароҳатлари даражасига кириши аниқланган.
Изоҳ (0)