Andijonda bloger ayolni kaltaklagani aytilgan tuman elektr tarmoqlari bosh hisobchisiga jinoyat ishi qo‘zg‘atildi. Bu haqda “Daryo” so‘roviga asosan Bosh prokuratura axborot xizmati rahbari Hayot Shamsutdinov ma’lum qildi.
22-noyabr kuni bloger Fotima Jo‘rayeva o‘zining Facebook sahifasida Andijon viloyati Ulug‘nor tumani elektor tarmoqlari korxonasi bosh hisobchisi tomonidan kaltaklanganini aytib, murojaat qilgandi. U o‘z murojaatida tuman elektr tarmoqlari korxonasi bosh hisobchisidan o‘zi huquqshunos sifatida ishlab kelayotgan fermer xo‘jaligiga elektr energiyasidan qarzdorlik sun’iy ravishda oshirilgani bo‘yicha tegishli hujjatlarni berishini talab qilganini, korxona bosh hisobchisi esa unga qo‘pol munosabatda bo‘lib, uni haqorat qilib, yuziga urgani va qo‘l telefonini sindirib yuborganini aytib, aybdor korxona xodimlariga nisbatan qonuniy chora ko‘rishni so‘ragan.
“Andijon hududiy elektr tarmoqlari” esa aksincha, ayolning o‘zi janjal chiqarishga uringanini bildirib, uning kaltaklanganini rad etgan.
Shundan so‘ng tuman IIB tomonidan tergovga qadar tekshiruv harakatlari olib borildi. Olib borilgan tergovga qadar tekshirish yakuniga ko‘ra, Ulug‘nor tumani Elektr tarmoqlari korxonasi bosh hisobchisi S.M.ga nisbatan Ulug‘nor tumani IIB huzuridagi Tergov bo‘linmasi tomonidan Jinoyat kodeksining 109-moddasi 2-qismi (qasddan badanga yengil shikast yetkazish) alomatlari bilan jinoyat ishi qo‘zg‘atilgan va Fotima Jo‘rayeva jinoyat ishida jabrlanuvchi deb e’tirof etilgan.
O‘tkazilgan sud-tibbiy ekspertizasining 25-noyabrdagi xulosasiga ko‘ra, Fotima Jo‘rayevada bosh miya chayqalishi, boshning chap qovoq sohasi yorilgani (tikilgan, lat yara), chap yelka, bel, qorin va dumba sohasi yumshoq to‘qimalarining lat yeyishi va qontalashlar kabi jarohatlar uning salomatligining qisqa muddatga buzilishiga sabab bo‘lgan tan jarohatlari darajasiga kirishi aniqlangan.
Izoh (0)