Йўргакданоқ ҳашаматли ҳаёт. Фарзандларининг барча истакларини сўзсиз муҳайё қиладиган машҳурлар (фото)

Қимматбаҳо автомобиллар, дизайнерлик либослари, кўчмас мулк ва санъат асарлари – бу машҳур болалар ҳали ўн олти ёшга тўлмаган, аммо улар аллақачон ҳаётда ҳамма нарсанинг  энг яхшисини кўриб улгурган.

Болаликданоқ улар катталар орзу қилиши мумкин бўлган ҳамма нарсага эга – шон-шуҳрат, пул ва чексиз имкониятлар. Балки, улар оддий болалик қувончлари нима эканлигини билмас, лекин ўйинчоқлари қанча туришини ва ота-оналарини ўзи хоҳлаган нарсага қандай жалб қилишни билади. Ушбу «олтин» авлодга ота-оналари томонидан барчаси муҳайё қилинганлиги учун уларда юлдузлик касалига чалиниш хавфи мавжуд.

Бейонсе ва Жей-Зининг фарзанди Блю Айви 9 ёшда

Бейонсе ва Жей-Зининг биринчи фарзанди Блю Айви Картер нафақат машҳурлар оиласида, балки қимматбаҳо совғалар, жумладан, нодир тошлар билан безатилган дизайнерлик курсиси, 50 минг долларлик аравача ва энг ҳашаматли бренд либослар орасида туғилган. Қизалоқ оиланинг чинакам эркатойи бўлиб улғайди. Жуфтлик ҳали ҳам унинг ҳар қандай инжиқлигини кўтаришга тайёр. Туғилган кун шарафига ўтказиладиган зиёфатлар, ҳашаматли автомобилларнинг мини-версиялари – унда аллақачон пушти Cadillac ва кўк Lamborghini бор, 75 000 долларлик араб айғири, заргарлик буюмлари ва онасининг кўйлагини такрорлайдиган либосларга қараганда Блю Айвининг ота-онаси хурсанд қилиш ва эркалатиш ўртасидаги фарқни аниқ ҳис қилмайдиганга ўхшайди.

2017 йилда Блюнинг эгизак синглиси ва укаси Сер ҳамда Руми дунёга келди. Афтидан, эгизаклар ҳам аллақачон шоҳона ҳаётнинг барча лаззатидан татиб кўрмоқда. Блю эса, эҳтимол, биринчи марта эътиборнинг етишмаслигини ҳис қилаётгандир. Айни пайтда Бейонсенинг сўзларига кўра, у ҳатто қизини оилада ўзини бегона ҳис қилмаслик учун туғуруқхонага олиб келмоқчи бўлган ва махсус кун учун қизига Givenchy ҳамшира костюмига буюртма берган. Онанинг бундай йўл тутиши қизнинг оилавий рақобатга кўникишига қанчалик ёрдам бергани сирлигича қолмоқда.

Кети Холмс ва Том Крузнинг фарзанди Сури Круз 15 ёшда

Сури ҳам келажакда Нью-Йорк «олтин» ёшларининг маликаси бўлишга тайёр. У ёшлигидан буён гардеробдан ўзи кийим танлайди. Шунингдек, фақат кўйлак ва юбкалар кийишни афзал кўради, баланд пошнали туфлиларни ёқтиради. Шунингдек, унинг ўзи шахсий ўқитувчиларини ишдан бўшатади ва бўш вақтида дугоналари билан Манхэттен марказидаги маникюр салонларига ташриф буюради. Сури 7 ёшида ҳатто ўзининг кийим-кечаклар тармоғини ҳам яратган.

Сури онаси билан яшайди, отаси билан деярли алоқа қилмайди, аммо Том Круз қизига мунтазам равишда қимматбаҳо совғалар юборади. Тарбия борасида унга масъул бўлган Кети Холмс қизини вақти-вақти билан баскетбол ўйинларига ёки музейларга олиб боради. Илгари Сури вақтини ҳашаматли жойларда ўтказишни талаб қилган бўлса, энди у ўзини камтарроқ тутишга ҳаракат қилмоқда.

Сальма Хайек ва Франсуа-Анри Пинонинг фарзанди Валентина Палома Пино 14 ёш

Актриса Сальма Хайек 41 ёшида қизини қийинчиликлар билан дунёга келтирди. Шифокорлар чақалоқнинг Даун синдроми билан туғилишини гумон қилган. Хайриятки, ҳомиладорликда мумкин бўлган муаммолар бартараф этилди ва Хайек-Пино оиласи бахтли ҳаёт кечирмоқда. Хўш, она дунёга машҳур актриса, ота-боболар Forbes рўйхатидан жой олган бўлса, қизга бирор нарсага муҳтож бўлиш ҳақида хаёл суришнинг кераги ҳам йўқ. Шунинг учун Валентина ёшлигиданоқ замонавий гардероб, мукаммал маникюр ва ижтимоий тадбирлар нима эканлигини билади. Миллиардер Франсуа-Анри Пино ўз қизини яхши кўради ва унга Лос-Анжелесда 12 миллион долларлик мулк сотиб олган.

Дональд ва Мелания Трамп фарзанди Баррон Трамп 15 ёш

АҚШ собиқ президентининг кенжа ўғли худди отасининг нусхаси бўлиб улғаймоқда. Онаси Мелания ҳатто интервьюсида уни «мини-Дональд» деб атаган. У нафақат Трампнинг ёшлигига ўхшаб кетади, балки вақти-вақти билан кийиниш услубидан ҳам нусха кўчиради, яъни узун галстукли костюмларга устунлик беради. Узоқ вақт давомида матбуот ва интернет фойдаланувчилари болани омма олдидаги «ғалати» хатти-ҳаракати учун масхара қилди, ҳатто президентнинг ўғли касал эканлиги айтилган эди, бунинг учун улар дарҳол ижтимоий тармоқдаги аккаунтларидан айрилди.

Бироқ кейинчалик маълум бўлишича, Баррон бутун дунё эътиборига одатланмаган ва Нью-Йоркда яшайдиган бола камтарона ҳаётни афзал кўради. У йилига 45 минг доллар турадиган хусусий мактабга боради, Trump Tower’даги ўзининг алоҳида қаватида қўриқчилар назоратида ўйнайди ҳамда онасининг косметика линиясидаги қора икрали юз ниқобларидан фойдаланади.

Виктория ва Дэвид Бекҳэм фарзанди Харпер Бекҳэм 10 ёш

Харпер Бекҳэмлар оиласининг чинакам маликаси. Онаси Виктория қизни замонавий кийимлар билан эркалайди ва у биринчи қаторда ўтириб, энг муҳим шоуларда иштирок этади. Дэвид эса деярли ҳар бир интервьюсида қизига барча нарсанинг фақат яхшисини беришини таъкидлайди.

Афтидан, Дэвид ҳақиқатан ҳам сўзида турадиган одамга ўхшайди, чунки унинг Харперга берган совғаларининг дабдабаси ва қимматлигига гап-сўз бўлиши мумкин эмас. Мисол учун, севимли қизининг 2 ёшга тўлган кунида футболчи унга бристоллик машҳур рассом Дамиэн Херстнинг 600 минг фунтлик расмини совға қилди. Шунингдек, спортчининг қизи олти ёшга тўлиши муносабати билан туғилган кунини нафақат шоҳона зиёфат қилиб нишонлаган, балки Букингем саройида Харпер дўстлари учун ташкил этган кечада Елизавета II нинг набираси малика Евгений мезбон сифатида иштирок этган.

Кембриж герцоги Уильям ва Кетриннинг фарзандлари Жорж 8 ёш, Шарлотта 6 ёш ва Луи 3 ёш

Зодагонлар энди аввалги даврдагидек камтар одамлар эмас. Улар орасида 1,5 миллион долларлик олмосли маникюр тўпламлари ва Кариб денгизидаги оролга тенг ўйинчоқлар билан таъминланган болалар ҳам бор. Мисол учун, Жорж туғилишидан олдин ҳам бошдан-оёқ совғага кўмилган эди ва тахтнинг бўлажак вориси туғилгандан кейингина совғалар оқими янада кўпая бошлади. Автомобиль, велосипед, скейтборд, теридан тикилган плаш, сёрфинг кийимлари, Австралиянинг Дарвин шаҳри ҳукуматининг шахсий тимсоҳи ва ҳатто Пиппа холадан янги туғилган шаҳзоданинг қўл-оёқларининг кумуш қуймалари кабилар. Кейт Миддлтон ўз авлодларини оддий болалар каби тарбиялашга ҳаракат қилади, бундай совғалар шаҳзода ва маликаларга уларнинг юксак мавқейини эслатиб туради.

Айтганча, Шарлотта совғалар сони бўйича акасидан қолишмайди. Биринчи туғилган кунида кичкина малика 64 мамлакатдан совға олди, улар орасида, масалан, 30 минг фунт стерлингга тенг олмос, ёқут ва сапфир тошлар билан безатилган олтин шақилдоқ, шунингдек, ўйинчоқлар ва бошқа совғалар бор эди.

Кристина Агилера ва Жордан Бретман фарзандлари Макс Лайрон Бретман ва Саммер Рейн, 13 ва 7 ёш

Кристина Агилера кўплаб юлдуз оналар сингари фарзандларини эркалаш имкониятини қўлдан бой бермайди. Масалан, қўшиқчи ва унинг ўша пайтдаги турмуш ўртоғи Жордан Бретман биринчи фарзанди туғилишидан олдин чақалоқ хонасига 35 минг доллар сарфлаган. У ерда чақалоқни қайиқ шаклидаги каравот, баҳайбат ярим ой, одам ўлчамидаги Паддингтон айиғи, ўнлаб ўйингоҳлар ва жуда қиммат дизайнерлик мебеллари кутиб турарди.

Кристинанинг қизига эса продюсер Мэттью Ратлер томонидан худди шундай эътибор қаратилмоқда. Она чақалоқ учун ранг-баранг зиёфатлар уюштирди, ҳақиқий малика каби кийинтирди ва ҳатто бир марта Америка журналларидан бирининг муқовасида чиқишини ҳам таъминлади.