Никоҳ оқшоми инсон ҳаётидаги муҳим кунлардан бири ҳисобланади. Бу унутилмас санада тарихга муҳрланган суратлар ва видеотасвирлар йиллар давомида кишига ёқимли хотираларни ёдга солиб туради. «Дарё» ўзбек шоу-бизнесидаги айрим санъаткорларнинг тўйидаги расмларини бир саҳифага жамлади.
Рашид Холиқов
Ўзбекистонда хизмат кўрсатган артист Рашид Холиқов 18 ёшида «Шаҳзод» гуруҳи йигитлари билан бир тўйга боради. У ерда рафиқаси Саидахонни кўриб, ёқтириб қолади. Икки ёш бир неча йил яқин муносабатда бўлади ва 1994 йили оила қуришади. Бугунги кунда уларнинг уч ўғил ва бир қиз фарзанди ҳамда қатор набиралари бор.
Муҳаммадисо Абдулҳаиров
Таниқли актёр Муҳаммадисо Абдулҳаиров турмуш ўртоғи Холида Абдулҳаировани илк бор 1987 йилда ҳозирги Ўзбекистон давлат санъат ва маданият институтида учратади.
«Институт деканатига мўраласам, ҳарф терувчи қиз машинкани аямай ‘савалаяпти’. Уни кўрганман-у, юрагимда ‘Муҳаббат, эй муҳаббат’ куйи янграб кетган. Юрагимда нимадир жиз этгани ҳамон ёдимда», — дейди актёр бир интервьюсида.
Муҳаммадисо Абдулҳаировнинг онаси 1992 йили икки ўғлини бир кунда уйлаб, хонадонига қўшкелин туширади. Ҳозирда улар Ақоиддин Муҳаммад ва Humoюддин Муҳаммад исмли ўғилларнинг ота-онасидир.
Севара Назархон
Ўзбекистонда хизмат кўрсатган артист Севара Назархон 2006 йилнинг сентябрида Баҳром Примқуловга турмушга чиққан.
Уларнинг никоҳ оқшоми «Ўзбекистон» меҳмонхонасининг ёзги ресторанида бўлиб ўтган. Жуфтликнинг Денгиз исмли ўғли ва Имон Анвар исмли қизи бор.
Самандар Ҳамроқулов
Ўзбекистонда хизмат кўрсатган артист Самандар Ҳамроқулов икки йил давомида ўзига муносиб жуфти ҳалол излайди. Аммо унга маъқул келган икки нафар қиз онасига ёқмайди. Шундан сўнг у бу мураккаб ишни волидасига топширади. Онаси топган наманганлик Дилнозахон исмли қиз Самандарнинг кўнглини ҳам жиз эттиради.
Уларнинг никоҳ тўйи 2007 йилнинг 10 августида бўлган. Мазкур сана оила учун жуда муҳим кун сифатида тарихга муҳрланган. Чунки 10 августда Самандар Ҳамроқуловнинг отаси Рустам Ҳамроқулов таваллуд топган.
Ҳалима Ибрагимова
Актриса ва қизиқчи Ҳалима Ибрагимова умр йўлдоши Жалол Мирзаевга 28 ёшида турмушга чиққан. Хўжайини ундан етти ёш кичкина.
«Турмуш ўртоғим — катта опамнинг қўшниси. Ҳар замон тўй-маъракаларга чиқиб қарашиб юрарди. Синглимнинг фарзандига ўғил тўй қилганимизда поччам билан тўйга келган. Ўшанда салом-аликдан сўнг яқинроқ танишиб қолганмиз. Кейинчалик ҳам боғланиб турдик. Қолгани ўзингизга маълум, уч сўм пул, бир каллақанд дегандай, тўйга уланиб кетди», — деган эди актриса интервьюларининг бирида. Ҳозирда бу оиланинг бир қиз ва бир ўғли бор.
Гулсанам Мамазоитова
Ўзбекистон халқ артисти Гулсанам Мамазоитова 2007 йилнинг ноябрь ойида Санжарбек исмли созанда йигит билан турмуш қурган. Бугунги кунда улар икки фарзанднинг ота-онаси ҳисобланади.
Жаҳонгир Позилжонов
«Божалар» гуруҳи яккахони Жаҳонгир Позилжонов «Бойвачча» фильмини суратга олиш жараёнида рафиқаси билан танишади. Бир неча йилдан сўнг, яъни 2008 йилда бўйдоқлик билан хайрлашади. Ўзбек шоу-бизнесидаги серфарзанд оталардан бири бўлган хонанданинг беш нафар фарзанди: икки ўғил ва уч қизи бор.
Паризода
«Ниҳол» мукофоти совриндори, маҳоратли раққоса Паризодани турмуш ўртоғи Шерали Сафаров Озодбек Назарбековнинг концертида кўриб, ёқтириб қолади. Уларнинг тўйи 2010 йилда бўлиб ўтади. Паризода никоҳ оқшомида қўшиқ куйлаб, хўжайинига сюрприз тайёрлайди. Бу жуфтлик бугунги кунда икки қиз ва бир ўғилнинг ота-онасидир.
Даврон Кабулов
«Миллион» жамоаси сардори ва таниқли бошловчи Даврон Кабуловга оила қургунича 614 нафар қизнинг номзод сифатида сурати кўрсатилган, уларнинг айримлари билан учрашувга чиққан. Вақт ўтиб, 2016 йилнинг май ойида Эъзозахон исмли қизга уйланган.
Даврон Кабулов «Афруз» гуруҳи яккахони Жамшид билан божа бўлган. Жуфтликнинг икки фарзанди бор.
Шаҳзода Муҳаммедова
Дизайнер ва актриса Шаҳзода Муҳаммедова 2018 йилнинг ноябрида Марат исмли йигитга турмушга чиққан. Улар маълум муддат Москвада яшагач, Тошкентга қайтиб келган. Жуфтлик 2020 йилда қиз фарзандли бўлган ва унга Милана деб исм қўйишган.
Изоҳ (0)