Тошкент шаҳрининг Учтепа туманида кўп қаватли уйлар деворида гиёҳванд моддалар рекламаси ёзувларини қолдириш билан шуғулланган аёл жаримага тортилди. Бу ҳақда пойтахт ИИББ ахборот хизмати хабар берди.
Маълум қилинишича, 25 ноябрь куни жиноят ишлари бўйича Учтепа туман судининг онлайн тарзда ўтказилган йиғилишида 1990 йилда туғилган фуқаро К.З.нинг маъмурий жавобгарлик ҳақидаги иши кўриб чиқилган. Аниқланишича, К.З. интернетдан пул эвазига «расм чизиш» ҳақидаги эълонни топиб, туманнинг 23-мавзе «Фарҳод» маҳалласида жойлашган кўп қаватли уйларнинг деворига гиёҳванд моддаларни татбиқ қилувчи интернет сайтларининг рекламаси ёзувларини чизган.
Профилактика инспекторлари фуқарога бу ишларни қилмаслиги ва ёзувларни ўчириб ташлаши бўйича олдин огоҳлантириш берганига қарамай, К.З. ўз фаолиятини давом эттириб келган.
Шу сабабли ушбу фуқарога нисбатан тегишли ҳужжатлар расмийлаштирилиб, қонуний қарор қабул қилишлик учун жиноят ишлари бўйича Учтепа туман судига юборилган.
Судда фуқаро К.З. ички ишлар ходимининг талабини бажармагани сабабли айбдор деб топилган ва унга нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) 1-қисми билан БҲМнинг 2 баравари (540 минг сўм) миқдорида жарима тайинланган.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Хусусан, Тошкентдаги уйлар деворида гиёҳванд моддалар рекламаси ёзувларини қолдириш билан шуғулланган икки йигит 6 апрель куни ушланган, интернетда гиёҳванд моддалар рекламаси жойлаштирилган 50 дан ортиқ ресурс ўчирилганди.
Изоҳ (0)