Андижон давлат тиббиёт институти клиникаси капитал таъмирлаш ишлари бошлангани сабабли 3 декабрь кунидан бошлаб вақтинча ёпилади. Бу ҳақда «Дарё» мухбири хабар берди.
Эслатиб ўтамиз, 29 сентябрь куни Ўзбекистон президенти Шавкат Мирзиёев Андижон вилоятига ташрифи давомида Андижон давлат тиббиёт институти клиникасига бориб, бу ердаги аҳволни кўздан кечирган ва клиникани тўлиқ реконструкция қилиб, унинг негизида водий аҳолиси учун кардиология, нейрохирургия, кўз касалликлари ва урология бўйича мураккаб операциялар ўтказадиган тиббиёт маркази ташкил этишга кўрсатма берган эди.
Қайд этилишича, бу шифохона 1975 йилда қуриб битказилган бўлиб, 650 ўринли 11 та даволовчи ва 7 та ёрдамчи бинолардан иборат. Клиникада 20 та даволовчи ва 15 та ёрдамчи бўлимларда 1000 дан ортиқ олий, ўрта, кичик тиббиёт ходимлари беморларга ихтисослаштирилган замонавий юқори технологик тиббий ёрдам кўрсатиб келмоқда.
Клиникага йилига ўртача 90 мингдан ортиқ мурожаат бўлиб, 30 мингдан зиёд бемор стационар тарзда даволанади. Шунингдек, Андижон давлат тиббиёт институти талабалари амалий машғулотларини айнан шу ерда ўтказади.
3 декабрь куни Андижон вилояти ҳокими Шуҳрат Абдураҳмонов томонидан капитал таъмирлаш ишларига старт берилган. Ҳоким қурилиш олдидан тиббиёт ходимлари билан ўтказилган учрашув давомида клиника биноси энг сўнгги, замонавий лойиҳалар асосида туркиялик қурувчилар томонидан капитал таъмирдан чиқарилишини билдирган.
«Туркиядан келган қурувчилар қилиб беради. Лойиҳа бўйича 1 сўмига хиёнат қилмасдан, айтилган нарсани жой-жойига қўйиб, сифатли қилиб, ҳар қандай одам кўрса, ‘отасига раҳмат дейдиган’ бўлиши керак», — дейди Андижон вилояти ҳокими.
У шу каби таъмирлашга кетадиган керакли пул ва тайёргарлик билан келганини маълум қилган. «Бирортанг бирор сўм пул йиғадиган бўлсанг, шу куни лавозимингдан ҳам оламан, шармандангни ҳам чиқариб ташлайман», — дея қўшимча қилган Абдураҳмонов.
Клиника бош шифокори ўринбосари Хуршидбек Мамадиевнинг айтишича, 6 декабрдан беморлар вилоят кўп тармоқли тиббиёт маркази, онкология ва эндикринология диспансерлари, кўз касалликлари, кардиология ва наркология шифохоналари, болалар кўп тармоқли тиббиёт маркази, республика шошилинч тез ёрдам илмий маркази Андижон филиали, Андижон шаҳар ҳамда Олтинкўл туман тиббиёт бирлашмалари марказий шифохоналарида қабул қилинади.
Таъкидланишича, капитал таъмирлаш ишлари 2022 йилнинг декабрь ойида якунланади. Қурилиш ишлари учун жами 150 миллиард сўм маблағ сарфланиши кўзда тутилган.
Изоҳ (0)