Ўзбекистон президентининг «Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида»ги фармонига мувофиқ, ҳудудларда тинчлик ва осойишталикни таъминлаш фаолиятининг самарадорлигини ошириш чоралари белгиланмоқда.
Хусусан:
- криминоген вазият ҳақидаги маълумотларни маҳаллалар кесимида таҳлил қилиш электрон тизими яратилиб, ҳудудларни автоматик равишда «яшил», «сариқ» ва «қизил» тоифаларга ажратиш тартиби жорий этилмоқда (ҳозирда жиноятларни маҳалла кесимида автоматик ҳисоблаш тизими мавжуд эмас ва бу борадаги ишлар эскича услубда қўлда бажарилади);
- ҳудуддаги секторлар раҳбарларининг жиноятларга қарши курашиш борасидаги фаолиятини ташкил этиш механизмлари белгилаб берилмоқда. Унга кўра, сектор раҳбарлари «яшил» тоифадаги маҳаллаларда амалга оширилган ишларни бевосита ўрганиб чиқиши ҳамда ижобий иш услублари, амалга оширган тадбирларни секторнинг «сариқ» ва «қизил» тоифадаги маҳаллаларида оммалаштириш чораларини кўриши белгиланмоқда.
Бунда, «темир дафтар», «аёллар дафтари» ва «ёшлар дафтари»га киритилган шахслар билан олиб борилаётган ишлар, аҳолининг бандлигини таъминлаш, фуқароларнинг ҳуқуқий онги ва ҳуқуқий маданиятини ошириш тадбирларининг самарали ташкил этилганига эътибор қаратилади.
Шунингдек, жиноятчиликка қарши курашиш бўйича 14 та «Ҳудуд методикаси» яратилади. 2022–2025 йилларда Ўзбекистонда жамоат хавфсизлигини таъминлаш тизимини ривожлантириш стратегиясида қуйидагилар белгиланган:
- жамоат хавфсизлигини таъминлаш, гуруҳий қонунбузарликлар ва оммавий тартибсизликларни бартараф этиш бўйича 14 та (Қорақалпоғистон Республикаси, Тошкент шаҳар ва вилоятлар) «Ҳудуд методикаси»ни ишлаб чиқиш ва амалиётга татбиқ этиш;
- содир этилган жиноят ва ҳуқуқбузарликларнинг асл омилларини «илмий диагноз» асосида аниқлаш ва «илмий диагноз хулосаси» билан «Э-жамоат хавфсизлиги» ахборот тизими орқали расмийлаштириш тартибини жорий қилиш.
Аввалроқ Ўзбекистонда очилмаган жиноятларни тадқиқ этиш билан шуғулланувчи институт ташкил этилгани, Ўзбекистонда жиноий жавобгарликка тортишнинг энг кам ёшини 13 ёшдан 14 ёшга ошириш режалаштирилаётгани тўғрисида хабар берилганди.
