Ўзбекистонда валюта бойликларини ноқонуний олиш ёки ўтказганлик учун жазо чоралари юмшатилди. Бу ҳақда Маъмурий жавобгарлик тўғрисидаги кодексга тегишли ўзгартиш киритиш бўйича қонун 30-нобяр куни президент Шавкат Мирзиёев томонидан имзоланди, деб хабар беради «Gazeta.uz».
Маълум қилинишича, Маъмурий жавобгарлик тўғрисидаги кодекс 170-моддасининг янги таҳририга кўра, валюта бойликларини қонунга хилоф равишда олиш ёки ўтказиш валюта бойликлари мусодара қилинган ҳолда 15 суткагача (олдин тўлиқ 15 сутка) маъмурий қамоқ жазосига сабаб бўлиши мумкин.
Маъмурий қамоқ қўлланилиши мумкин бўлмаган шахсларга базавий ҳисоблаш миқдорининг 10 бараваридан 20 бараваригача (олдин 20 БҲМ) жарима қўлланилади.
Ўзгаришлар 1 декабрдан бошлаб амал қилади. Қонун Қонунчилик палатаси томонидан 18 октябрда қабул қилинган, Сенат томонидан 19 ноябрда маъқулланган.
Аввалроқ Олий Мажлис Қонунчилик палатаси депутати Расул Кушербаев дам олиш кунлари долларни «қора бозор»да алмаштиришга мажбур бўлганини ёзиб, Марказий банкни танқид қилганди. «Мен ўзим хоҳламаган ҳолда ‘қора бозор’ни қидириб, 50 долларни қайтим билан олишим учун жиноятга йўл қўйиб, ноқонуний валюта айирбошлашим керак… Ҳозир менга гувоҳ бўлиб турасизлар деб, банкнинг вакилларини чақирдим», — деб ёзганди депутат.
Мавзуга доир:
Изоҳ (0)