Қирғизистонда ҳокимиятни зўравонлик билан эгаллаб олишга уриниш ташкилотчилари жавобгарликка тортилиши зарур, деди республика Хавфсизлик кенгаши котиби Марат Имонқулов.

Фото: Спутник

«Ёш йигитлардан фойдаланганлар жавобгарликка тортилиши шарт, деган фикрдаман. Улар буни ўзлари ўйлаб топмаган бўлса керак. Уларни мафкуравий тарбиялаган ташкилотчилар бор, деб ўйлайман», — деди Имонқулов ва мазкур ёшларни бузғунчи мафкуралардан халос қилиш кераклигини қўшимча қилди.

Имонқуловнинг айтишича, у ҳокимиятни зўравонлик йўли билан эгаллаб олишга тайёргарлик кўришда гумонланиб ҳибсга олинган шахслар билан учрашув ўтказган.

«Аввалроқ мен бу ёшлар билан учрашдим, улар мамлакатда мавжуд муаммоларни айтди. Мен уларга муаммо бор соҳани ўз зиммасига олишни таклиф қилдим, уларнинг номзодини кўрсатишим мумкинлигини айтдим, лекин улар рад этди. Мен уларга бировнинг қўлида бузғунчи ишларда фойдаланиладиган қуролга айланиб қолмасликларини айтдим», — деди Имонқулов.

26 ноябрь куни Қирғизистон махсус хизматлари мамлакатда ҳокимиятни зўравонлик билан эгаллаб олишни режалаштирган жиноий гуруҳ фаолияти бостирилгани ҳақида хабар берган эди. Қирғизистон Бош прокуратураси томонидан мазкур ишни тергов қилиш учун идоралараро тергов гуруҳи тузилган.

Прокуратурада қайд этилишича, оммавий норозилик намойишларини ташкил этиш учун мингга яқин тажовузкор ёшлар танлаб олинган, улар билан давлат тузилмаларига қарши мафкураларни сингдиришга қаратилган тизимли учрашувлар ўтказилган, оммавий тартибсизликлар келтириб чиқариш режалари муҳокама қилинган ва давомий равишда ҳокимиятни зўравонлик йўли билан эгаллашга ундаб келинган.

26 ноябрь куни Қирғизистон Марказий сайлов комиссиясининг мажлисида республика Миллий хавфсизлик давлат қўмитаси (ГКНБ) терговчиси Дамир Суваналиев МСК аъзоларидан Қирғизистон «Яшиллар» партиясининг уч нафар депутати Нурис Суеркулов, Руслан Акматбоев ва Бекназар Купешевни давлат тўнтаришига тайёргарлик кўриш иши бўйича жиноий жавобгарликка тортишни сўради. Қирғизистон Марказий сайлов комиссияси розилик берди.

Қирғизистонда 28 ноябрь куни парламент сайловлари бўлиб ўтмоқда. Шу муносабат билан 25 ноябрь куни Қирғизистон Ички ишлар вазирлигининг бутун шахсий таркиби кучайтирилган хизмат режимига ўтказилган.