АОКАда 27 ноябрь куни Халқ таълими вазирлиги ахборот хизмати раҳбари Лайло Рустамова иштирокида Ўзбекистонда мактаблар етишмовчилиги мавзусида брифинг бўлиб ўтди. Бу ҳақда «Расмий хабарлар» хабар қилди.

Маълум қилинишича, 2018—2021 йилларда Ўзбекистон мактабларида қўшимча 474,5 минг ўқувчи ўрни яратилган. Бу учун давлат бюджетидан 5 триллион сўмдан ортиқ маблағ ажратилган. Бундан ташқари, мактаблар 11 йиллик таълим тизимига ўтиши муносабати билан бўшаб қолган 383 та касб-ҳунар коллежи мактабларга айлантирилиб, 221 минг қўшимча ўқувчи ўрни юзага келган.

Қайд этилишича, 2022 йилда республика бўйича 15 176 ўқувчи ўрнига мўлжалланган 37 та мактабни янгидан қуриш, 71 819 ўқувчи ўрнига мўлжалланган 180 та мактабни реконструкция қилиш ва мавжуд 89 тасини мукаммал таъмирлаш белгиланган.

Таъкидланишича, Ўзбекистонда 5 миллиондан ортиқ ўқувчи ўрнига мўлжалланган 10 130 та мактабда 6 миллион 246 мингдан ортиқ ўқувчи таълим олмоқда. Халқ таълими вазирлиги прогнозларига кўра, кейинги 5 йилда мактаб ўқувчиларининг кутилаётган сони 7,5 миллионга етиши кутилмоқда.

Собиқ халқ таълими вазири Шерзод Шерматов 4 май куни Олий Мажлис Қонунчилик палатаси йиғилишида Ўзбекистондаги мактабларда синфларнинг тўлалиги ва дарслар икки сменада олиб борилаётгани сабабларини санаб ўтганди. Унинг сўзларига кўра, бугунги кунда мамлакатда ўқувчилар сони мактаблар лойиҳавий қувватидан сезиларли даражада ошиб кетган. «Ўқувчи сони билан ўқувчи ўрни ўртасидаги фарқ ҳозир бир миллион бўлса, 2025 йилга келиб 2 миллионга чиқиши мумкин. Бу дегани, мактаблар сиғимидаги ҳолат жуда қийин аҳволга тушиб қолиши мумкин», — деган эди Шерзод Шерматов.