Ўзбекистон биржа савдоларида Аи-80 маркали бензин нархи бир ҳафтада 15 фоизга арзонлашди

Ўзбекистон биржа савдоларида АИ-80 маркали автомобиль бензини нархи тушишда давом этмоқда. 22 ноябрда нарх 15 ноябрдаги билан солиштирганда 15 фоизга арзонлаган, деб хабар бермоқда Монополияга қарши курашиш қўмитаси.

Маълум қилинишича, кичик 1 тонна лотлар ҳажми 2021 йилнинг 22 ноябрдан 50 фоизгача оширилган. Биржа савдоларига жами 4317 тонна АИ-80 маркали бензин қўйилган бўлса, шундан 3879 тонна ёки 90 фоизи сотилган.

Натижада 22 ноябрь куни АИ-80 маркали автомобиль бензинининг ўртача сотилиш нархи 1 тоннаси 10 миллион 129 минг сўмдан 8 миллион 570 минг сўмгача пасайиб, 15 фоизга арзонлашган.

Таъкидланишича, кичик 1 тонна лотлар савдосида Бухоро НҚИЗ томонидан маҳаллий хом ашёдан ишлаб чиқарилган бензиннинг ўртача сотиш нархи 7 миллион 55 минг сўмгача пасайган ва 16 ноябрга нисбатан 28 фоизга арзонлашган. Саноат энергетика гуруҳи МЧЖ ҚК маҳсулоти бўйича пасайиш 15 фоизни ташкил этган.

Қайд этилишича, биржа савдолари орқали бензин сотиб олувчи кунлик харидорлар сони 7 баробарга ошиб, 32 тадан 239 тага кўпайган.

Эслатиб ўтамиз, 17 ноябрдан буён биржа савдоларида АИ-80 бензинининг нархида тушиш кузатилмоқда. Шу куни савдоларда бензин нархи 9 миллион 365 минг сўмгача тушиб, 15 ноябрга нисбатан 8 фоизга арзонлашган. 18 ноябрь куни эса 9 миллион 180 минг 500 сўмга пасайиб, 9 фоизга арзонлашган. 22 сентябрь ҳолатига кўра бензин нархи ҳамон тушишда давом этмоқда. Биржа матбуот хизматининг маълум қилишича, 15–21 ноябрь кунлари бензиннинг кунлик ўртача нархлари маҳсулотнинг бир тоннаси учун 10 129 400 сўмдан 9 168 400 сўмгача, яъни 9,5 фоизга пасайган.