Ўзбекистонда коронавирусга қарши бустер доза билан ихтиёрий эмлаш амалга оширилади. Бу ҳақда Санитария-эпидемиология хизмати хабар беради.

Маълум қилинишича, Ўзбекистон бош давлат санитария врачининг кўрсатма хатига мувофиқ республика аҳолиси ўртасида коронавирус инфекциясига қарши иммунитетни ошириш мақсадида 17 ноябрь кунидан бошлаб тўлиқ вакцина курсини олган фуқаролар (2 ёки 3 маротаба эмланганлар) бустер доза билан ихтиёрий эмланади.

Эслатиб ўтамиз, мамлакатда аҳолини коронавирусга қарши эмлаш тадбирлари 1 апрелдан бошланди. Эмлаш ихтиёрий ва бепул, вакцина олишдан бош тортганларга ҳеч қандай чора кўрилмайди. Июнь охиридан бошлаб эса Тошкентда 18 ёшдан ошганлар коронавирусга қарши оммавий эмлаш бошланганди.

Хусусан, ҳозирги кунга қадар 6 турдаги 42 миллион 805 минг доза COVID-19 га қарши вакцина келтирилган. Шунингдек йил охирига қадар 5,6 миллион доза вакцина келтирилиши кутилмоқда.

Маълумот учун, вакцинациядан сўнг инсонларда одатда коронавирусга қарши юқори ҳимоя даражаси шаклланади. Вакциналар жуда самарадор бўлиб бораётганига қарамай, вақт ўтиши билан COVID-19 инфекциясига қарши ҳимоя кучсизланади. Вакцинанинг дастлабки ҳимояси кучсизлана бошлагач, ҳимояни кучайтириш учун қўшимча вакцина қилинади — бу бустер доза дейилади.