Бош прокурор ўринбосари лавозимида ишлаб келган Акмалхўжа Мавлонов Давлат божхона қўмитаси раиси лавозимига маъқулланди.
Олий Мажлис Қонунчилик палатаси матбуот хизматининг маълум қилишича, 18 ноябрь куни бўлиб ўтган навбатдаги мажлисда депутатлар Давлат божхона қўмитаси раиси лавозимига Акмалхўжа Мавлонов номзодини кўриб чиқди ва маъқуллади.
У Қашқадарё вилояти ҳокими вазифасини бажарувчи этиб тайинланган Муроджон Азимов ўрнини эгаллади. Қашқадарё вилоятининг собиқ ҳокими Зоир Мирзаев эса Чирчиқ шаҳри ҳокими лавозимини эгаллаган Даврон Ҳидоятов ўрнига Тошкент вилоятига раҳбар бўлди.
Акмалхўжа Мавлонов 1975 йилда туғилган. 2002 йилда Тошкент давлат юридик институтини тамомлаган.
Прокуратура органларидаги иш фаолиятини 2002 йилда Давлатобод туман прокуратурасида бошлаб, Наманган вилояти прокуратураси органларида турли лавозимларда, 2006 йилдан Бош прокуратура бошқарма прокурори, катта прокурори, Марғилон шаҳар прокурори, Сирдарё вилояти прокурорининг биринчи ўринбосари, Хоразм вилояти прокурори лавозимларида фаолият юритган.
2018 йил февраль ойидан Бош прокуратура ҳузуридаги Иқтисодий жиноятларга қарши курашиш департаменти бошлиғи лавозимида ишлаган. Ўша йили август ойида бош прокурор ўринбосари этиб тайинланган.
2019 йил июлидан 2020 йил октябрига қадар Наманган вилояти прокурори лавозимида ишлаган. 2020 йилнинг октябридан ҳозирга қадар бош прокурор ўринбосари лавозимида ишлаб келаётганди.
Изоҳ (0)