Бухоро вилояти Когон шаҳрида тупроқ ўпирилиши оқибатида 2 киши ҳалок бўлгани тўғрисида хабар берилганди. Вилоят ИИБ ахборот хизмати раҳбари Шуҳрат Жалоловнинг «Дарё»га маълум қилишича, ишчиларнинг тупроқ ва қум босиши оқибатида вафот этгани юзасидан жиноят иши қўзғатилган.
Таъкидланишича, вилоят ИИБ Тергов бошқармаси томонидан тергов-суриштирув ҳаракатлари олиб борилмоқда. Ҳолат юзасидан Жииноят кодексининг 257-модда (меҳнатни муҳофаза қилиш қоидаларини бузиш), 2-қисми бўйича жиноий иш қўзғатилган. Ушбу қисмга кўра, айбланувчи муайян ҳуқуқдан маҳрум қилиниб, икки йилдан беш йилгача озодликни чеклаш ёхуд беш йилгача озодликдан маҳрум қилиш билан жазоланади.
Вилоят фавқулодда вазиятлар бошқармаси ахборот хизмати раҳбари Миржон Файзуллаевнинг сўзларига кўра, ҳолат жойига 25 нафардан ортиқ 3 та қутқарув экипажи жўнатилиб, тезкор қидирув ҳаракатларига қарамай, жиззахлик бўлган икки нафар ишчини (улардан ёши 21 ва 22 да бўлган) катта ҳажмдаги қум ва тупроқ остидан олиб чиққунга қадар улар ҳаво етишмаслиги оқибатида вафот этган.
Ҳодиса содир бўлган жойга чиққан Бухоро вилояти Ички ишлар ҳамда Фавқулодда вазиятлар бошқармалари, Когон шаҳар прокуратураси, вилоят ИИБ ва Когон шаҳар ИИБ масъул раҳбар ва ходимларидан иборат таркибда тергов-тезкор гуруҳи томонидан ҳолат тегишли тартибда расмийлаштирилган.
Жабрланувчиларнинг жасади вилоят ФВБ ходимлари томонидан қум уюми остидан олиб чиқилиб, суд-тиббий экспертиза кўригидан ўтказилган.
Бухоро вилояти «Сувоқава» раҳбари ўринбосари Бахтиёр Назаровга кўра, Когон шаҳар «Дўстлик» МФЙ Дўстлик кўчасида «61-автокорхона» МЧЖ томонидан 1000 миллиметрли сув қувурлари ётқизилаётган бўлган.
Маълум бўлишича, «61-автокорхона» масъулияти чекланган жамият меҳнат шартномасига асосан, бир нечта кишини сув қувурлари ётқизилиши бўйича ишларига жалб қилган. 1000 миллиметрли сув қувурлари ётқизиш учун эни 2,5—3 метр оралиғидаги 4 метрдан ортиқ чуқурликлар ҳамда ҳар 10 метр оралиқда сизот сувларини чиқариб ташлаш учун қудуқлар, яъни ўралар ковланади.
«Қувурлар ётқизиш жараёнида эса улар устининг ярми қум билан тўлдирилиб, сўнг тупроқ билан ёпилади. Худди шу жараёнда ишчини қум ёки тупроқ босиб қўймаслиги учун мустаҳкам ёғоч ‘шитълар ўрнатилади, ушбу шитлар ҳимоя вазифасини бажаради. Бироқ юқоридаги ҳолат чоғида чуқурликда ҳимояланиш учун ‘шит’ ўрнатаётган ёш ишчилар мувозанатни йўқотишган ва ‘шит’ олдинга силжиб кетган. Ўра юқорисида пастдаги икки нафар йигит билан ишлаб турган йигитлар ҳам кутилмаганда содир бўлган ўпирилиш оқибатида уларга кўмак бера олмаган. Икки ёш ишчи қум ва тупроқ остида қолиб кетган», — дейди Бахтиёр Назаров.
Аввалроқ Қорақалпоғистонда тупроқ босиб қолиши оқибатида 3 киши вафот этгани, Самарқандда қувурни таъмирлаётган икки ишчи тупроқ босиб қолиши оқибатида ҳалок бўлгани тўғрисида хабар берилганди.
Изоҳ (0)