Buxoro viloyati Kogon shahrida tuproq o‘pirilishi oqibatida 2 kishi halok bo‘lgani to‘g‘risida xabar berilgandi. Viloyat IIB axborot xizmati rahbari Shuhrat Jalolovning “Daryo”ga ma’lum qilishicha, ishchilarning tuproq va qum bosishi oqibatida vafot etgani yuzasidan jinoyat ishi qo‘zg‘atilgan.
Ta’kidlanishicha, viloyat IIB Tergov boshqarmasi tomonidan tergov-surishtiruv harakatlari olib borilmoqda. Holat yuzasidan Jiinoyat kodeksining 257-modda (mehnatni muhofaza qilish qoidalarini buzish), 2-qismi bo‘yicha jinoiy ish qo‘zg‘atilgan. Ushbu qismga ko‘ra, ayblanuvchi muayyan huquqdan mahrum qilinib, ikki yildan besh yilgacha ozodlikni cheklash yoxud besh yilgacha ozodlikdan mahrum qilish bilan jazolanadi.
Viloyat favqulodda vaziyatlar boshqarmasi axborot xizmati rahbari Mirjon Fayzullayevning so‘zlariga ko‘ra, holat joyiga 25 nafardan ortiq 3 ta qutqaruv ekipaji jo‘natilib, tezkor qidiruv harakatlariga qaramay, jizzaxlik bo‘lgan ikki nafar ishchini (ulardan yoshi 21 va 22 da bo‘lgan) katta hajmdagi qum va tuproq ostidan olib chiqqunga qadar ular havo yetishmasligi oqibatida vafot etgan.
Hodisa sodir bo‘lgan joyga chiqqan Buxoro viloyati Ichki ishlar hamda Favqulodda vaziyatlar boshqarmalari, Kogon shahar prokuraturasi, viloyat IIB va Kogon shahar IIB mas’ul rahbar va xodimlaridan iborat tarkibda tergov-tezkor guruhi tomonidan holat tegishli tartibda rasmiylashtirilgan.
Jabrlanuvchilarning jasadi viloyat FVB xodimlari tomonidan qum uyumi ostidan olib chiqilib, sud-tibbiy ekspertiza ko‘rigidan o‘tkazilgan.
Buxoro viloyati “Suvoqava” rahbari o‘rinbosari Baxtiyor Nazarovga ko‘ra, Kogon shahar “Do‘stlik” MFY Do‘stlik ko‘chasida “61-avtokorxona” MChJ tomonidan 1000 millimetrli suv quvurlari yotqizilayotgan bo‘lgan.
Ma’lum bo‘lishicha, “61-avtokorxona” mas’uliyati cheklangan jamiyat mehnat shartnomasiga asosan, bir nechta kishini suv quvurlari yotqizilishi bo‘yicha ishlariga jalb qilgan. 1000 millimetrli suv quvurlari yotqizish uchun eni 2,5—3 metr oralig‘idagi 4 metrdan ortiq chuqurliklar hamda har 10 metr oraliqda sizot suvlarini chiqarib tashlash uchun quduqlar, ya’ni o‘ralar kovlanadi.
“Quvurlar yotqizish jarayonida esa ular ustining yarmi qum bilan to‘ldirilib, so‘ng tuproq bilan yopiladi. Xuddi shu jarayonda ishchini qum yoki tuproq bosib qo‘ymasligi uchun mustahkam yog‘och ‘shit’lar o‘rnatiladi, ushbu shitlar himoya vazifasini bajaradi. Biroq yuqoridagi holat chog‘ida chuqurlikda himoyalanish uchun ‘shit’ o‘rnatayotgan yosh ishchilar muvozanatni yo‘qotishgan va ‘shit’ oldinga siljib ketgan. O‘ra yuqorisida pastdagi ikki nafar yigit bilan ishlab turgan yigitlar ham kutilmaganda sodir bo‘lgan o‘pirilish oqibatida ularga ko‘mak bera olmagan. Ikki yosh ishchi qum va tuproq ostida qolib ketgan”, — deydi Baxtiyor Nazarov.
Avvalroq Qoraqalpog‘istonda tuproq bosib qolishi oqibatida 3 kishi vafot etgani, Samarqandda quvurni ta’mirlayotgan ikki ishchi tuproq bosib qolishi oqibatida halok bo‘lgani to‘g‘risida xabar berilgandi.
Izoh (0)