Олий Мажлис Қонунчилик палатасида Халқ демократик партияси фракциясининг «Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги қонун лойиҳаси муҳокамасига оид навбатдаги йиғилиши бўлиб ўтди. Бу ҳақда партия ахборот хизмати хабар қилди.
Маълум бўлишича, иккинчи ўқишда кўриб чиқилган қонун лойиҳаси қизғин тортишувлар асосида муҳокама қилинган. Қонун алкоголь ва тамаки маҳсулотларининг тарқатилишини ҳамда истеъмол қилинишини чеклаш соҳасидаги муносабатларни тартибга солиш, фуқароларнинг, аввало, йигирма бир ёшга тўлмаган шахсларнинг соғлиғини алкоголь ва тамаки маҳсулотларини истеъмол қилишнинг зарарли таъсиридан ҳимоя қилиш, шунингдек, жамиятда соғлом турмуш тарзини шакллантириш ҳамда қарор топтиришнинг ташкилий ва ҳуқуқий шарт-шароитларини яратиш мақсадида қабул қилинмоқда.
Таъкидланишича, қонун лойиҳасини ишлаб чиқишда бир қатор хорижий давлатлар тажрибаси ўрганилган. Жумладан, АҚШ ва Қозоғистонда 21 ёшга тўлмаганларга алкоголь ва тамаки сотиш тақиқланиши, Туркманистон ва Индонезияда 21 ёшга тўлмаганларга, Ҳиндистоннинг 17 та штатида эса 21—25 ёшга тўлмаганларга алкоголь сотиш тақиқлангани инобатга олиниб, Ўзбекистонда ҳам бу борада ёшга доир тақиқни 21 ёшгача ошириш таклиф этилмоқда.
Қайд этилишича, қизғин муҳокамалардан сўнг қонун лойиҳаси депутатлар томонидан маъқулланган.
Эслатиб ўтамиз, «Миллий тикланиш» демократик партияси депутатлари ҳам шу қонун лойиҳасини муҳокама қилган ва мамлакатда электрон сигареталарни тақиқлашни таклиф қилганди.
Изоҳ (0)