Наманган вилоятида ўз фарзандини 7 миллион сўм эвазига сотиб юбормоқчи бўлган аёл қўлга олинди, дея хабар қилмоқда вилоят ИИБ ахборот хизмати.
Маълум қилинишича, 2021 йил 8 ноябрь куни, Косонсой туманида яшовчи, 1990 йилда туғилган фуқаро ариза билан мурожаат қилиб, Мингбулоқ туманида яшовчи, 1984 йилда туғилган аёл 2021 йил 11 июлда туғилган қизини 7 миллион сўмга сотмоқчилигини маълум қилиб, чора кўришни сўраган.
Мазкур ариза юзасидан шу куни вилоят ИИБ ва туман ИИБ ходимлари томонидан ўтказилган тадбир давомида, аёл қизини яшаш уйи олдида аризачига 7 миллион сўмга сотишга келишиб, 3 миллион сўм ва 100 АҚШ долларини олаётган вақтида ушланган.
Ушбу ҳолат бўйича туман ИИБ ҳузуридаги ТБ томонидан Жиноят кодексининг 135-моддаси 3-қисми (одам савдоси) билан жиноят иши қўзғатилган.
Бундан аввал Тошкентда уч кунлик чақалоғини 9 минг долларга сотишга уринган аёлга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 млн сўмга сотишга уринган эр-хотин жиноят устида қўлга олингани ҳақида хабар берилганди.
Изоҳ (0)