Ижро маҳорати ва ўзига хос роллари билан мухлислар қалбидан жой олиб улгурган ҳинд актёри — Ритик Рошан қандай фильмларда иштирок этмоқчи экани ҳақида маълумот бериб ўтамиз.
«Викрам Ведҳа»
2021 йилнинг октябрида Ритик Рошан тамил фильми «Викрам Ведҳа»нинг ҳинд тилидаги ремейкини суратга олиш ишларида иштирок этишни бошлаб юборди. Тамил фильми «Викрам Ведҳа» 2017 йил экран юзини кўрган бўлиб, унда Мадхаван, Вижай Сетупати суратга тушган. Ҳиндча версияда эса мухлислар Ритик билан бирга Саиф Али Хонни ҳам кўриши мумкин бўлади.
«Рамаяна»
Ритик Рошан «Рамаяна»нинг янги версиясида Дипика Падуконе билан суратга тушади. Улар Рам ва Ситани гавдалантириши кутилаётган лойиҳада, шунингдек, Ранбир Капур ҳам рол ижро қилади.
«Жангчи»
Айни вақтда Шоҳруҳ Хон ижросидаги «Патҳан» фильмини суратга олаётган Сиддхарт Ананднинг кейинги «Жангчи» (Fighter) номли лойиҳаси Ҳиндистон тарихидаги илк ҳаво-ҳарбий кучлари фаолиятига асосланган фильм бўлиши кутилмоқда. Унда ҳам актёр Дипика Падуконе билан бирга суратга тушади.
«Криш-4»
Ритик Рошан иштирокидаги «Криш» фильми илк бор бундан 15 йил аввал 2006 йилда экран юзини кўрган эди. Фильм нафақат Ҳиндистон, балки бутун дунёда машҳурликка эришган. Актёр франшизанинг тўртинчи қисмида ҳам суратга тушиб, бош қаҳрамонни гавдалантиради. Мухлислар анчадан интиқлик билан кутаётганига қарамай, «Криш-4»нинг суратга олишни бошлаш бироз чўзилган, режиссёр Ракеш Рошан эса бунинг боиси бир неча сабаб билан боғлиқлигини таъкидлаган. Шунингдек, у сценарий устида ишлаш ҳали якунига етмаганини маълум қилган. Ритик Рошан «Викрам Ведҳа» ва «Жангчи»дан кейин «Криш-4»нинг суратга олиш ишларида иштирок этишни бошлаб юборади.