«Калмар ўйини» режиссёри Хван Дон-Хёк сериалнинг давомини суратга олишга ваъда берди

«Калмар ўйини» режиссёри ва сценарий муаллифи Хван Дон-Хёк, сериалнинг давомини олиш нияти борлигини маълум қилди. Режиссёрнинг интервьюси Associated Press нашрининг Twitter саҳифасида эълон қилинган, деб ёзади «Kino.mail.ru».

«Босим, талаб ва севгининг шунчалик кўп бўлганидан, бизга танлов қолдирмаслигингизни ҳис қиляпман», — деган режиссёр. Шунингдек, у айни вақтда иккинчи мавсумни режалаштириш билан банд эканини таъкидлаган. Шунга қарамай, сериалнинг янги қисмларининг чиқиш вақти ҳақида гапиришга ҳали эрта. Негаки, Netflix платформаси иккинчи мавсумни ҳали расман тасдиқламаган. CNBC’нинг маълум қилишича, сервис вакиллари воқеаларнинг эҳтимолий ривожланишини муҳокама қилган, аммо ҳали якуний қарор қабул қилинмаган.

Маълумот учун, 2021 йилнинг сентябрида Netflix орқали тақдим қилинган сериалини 17 кун ичида 111 миллион обуначи томоша қилган. Шунингдек, «Калмар ўйини», «Брижертон»сериалини ортда қолдириб, Netflix тарихидаги энг машҳур лойиҳа бўлган. Аввалроқ «Калмар ўйини» юлдузи Ли Жон-же сериалдан кейин янги лойиҳаларга таклиф бўлмагани ҳақида маълум қилганди.