Armaniston bosh vaziri vazifasini bajaruvchi Nikol Pashinyan va uning rafiqasi Anna Akopyan koronavirusga qarshi emlandi. Bu haqda Pashinyan Facebook sahifasiga joylagan video orqali ma’lum qildi, deb yozadi “RBK”.
Foto: Facebook
“Bugun Anna bilan koronavirusga qarshi emlandik. Biz fuqarolarimizni kasalxonalardan faol foydalanishga va emlanishga chaqiramiz”, — deyiladi videoxabar izohida.
Kadrlarda jarayon qanday amalga oshirilayotgani aks etgan, xususan, mamlakat bosh vaziri rafiqasi bilan tibbiy muassasaga yetib kelgani, shifokorlar ularning qon bosimini o‘lchagani, shundan so‘ng vaksina yuborgani kabi. Pashinyan va Akopyan qanday vaksina bilan emlangani haqida ma’lumot berilmagan.
Pashinyan fuqarolarga 2021-yilning ikkinchi yarmida yetakchi mamlakatlar emlanmaganlar uchun cheklovlar kiritishi mumkinligini eslatib o‘tdi.
Fevral oyi boshida Armaniston Sog‘liqni saqlash vazirligi Rossiyaning “Sputnik V” koronavirusga qarshi vaksinasini tasdiqlagan edi. Rossiya vaksinasining 15 ming dozadan iborat birinchi partiyasi Armanistonga 8-aprelda yetkazib berilgan. “Sputnik V”dan tashqari, mamlakatda yana ikkita vaksina — AstraZeneca va Pfizer’dan foydalanish ma’qullangan.
Armanistonda koronavirusga qarshi kurash doirasida 11-iyulgacha karantin e’lon qilingan. Mamlakat Sog‘liqni saqlash vazirligi ma’lum qilishicha, 3-may holatiga ko‘ra, mamlakatda 217 mingdan ortiq kishida koronavirus qayd etilgan. Bemorlarning 200 mingdan ortig‘i sog‘aygan, 4,1 ming kishi vafot etgan. Armanistonda so‘nggi bir kecha-kunduzda 145 kishida COVID-19 aniqlangan.
25-aprel kuni Pashinyan bosh vazir lavozimidan iste’foga chiqqan edi. Pashinyanning aniqlik kiritishicha, 20-iyunda bo‘lib o‘tadigan parlamentga navbatdan tashqari saylovlargacha u hukumat rahbari vazifasini vaqtinchalik bajaruvchi bo‘lib turadi.
Armaniston parlamentining “Mening qadamim” hukmron fraksiyasi mamlakat bosh vaziri vazifasini bajaruvchi Nikol Pashinyan nomzodini bosh vazir lavozimiga ko‘rsatdi. Bu muddatidan ilgari o‘tkaziladigan parlament saylovi uchun nomzodning rasman ilgari surilishidir. Armaniston konstitutsiyasiga ko‘ra, agar parlament bosh vazirni ikkinchi muddatga saylamasa, navbatdan tashqari parlament saylovlari o‘tkazilishi mumkin.
“Aynan shu maqsadda (bosh vazirni ikki marta saylamaslik va navbatdan tashqari parlament saylovlarini o‘tkazish) ‘Mening qadamim’ bloki Nikol Pashinyan nomzodini ilgari surdi”, — deya Pashinyanning so‘zlarini keltirdi “Sputnik Armeniya”.
Avvalroq Armaniston bosh vaziri Nikol Pashinyanning mamlakat janubidagi Agardak shahriga ishchi safari chog‘ida bir necha yuzlab mahalliy aholi uning tashrifiga qarshi norozilik namoyishi o‘tkazgan edi.
