Хитой Соғлиқни сақлаш давлат қўмитаси 2 ноябрь куни мамлакат ичида коронавирусга чалиниш бўйича 93 та ҳолатни қайд этди, деб хабар беради «Интерфакс».
Маълум қилинишича, касалланиш ҳолатларининг 35 таси Хейхе шаҳрида (Хейлунсзян провинциясининг шимоли-шарқий қисми) қайд этилган. Хитой Соғлиқни сақлаш давлат қўмитаси маълумотларига кўра, 1 ноябрь куни 54 кишида, 31 октябрда 59 кишида, 30 октябрда эса 48 кишида коронавирус тасдиқланганди.
Хитойда касалланиш бўйича «ички» янги тўлқин 17 октябрдан бошланган, бу вақт давомида 17 та провинция ва туманларда 500 дан ортиқ кишида COVID-19 аниқланган, уларнинг 426 таси вируснинг ҳозирги тўлқини манбаларига боғлиқ.
Хитой ОАВлари ушбу тенденцияни «хавотирли» деб атамоқда, чунки касалланишнинг янги ҳолатлари аниқланаётган ҳудудлар ҳукумат томонидан қаттиқ чоралар кўрилаётганига қарамай, кенгайиб бормоқда.
ОАВлар Пекинда саккиз кишида коронавирус аниқланганига эътибор қаратган — бу пойтахтда 2021 йилнинг 19 январидан буён қайд этилган энг юқори кўрсаткич ҳисобланади. Шунингдек, аҳолига шаҳардан ташқарига сафарларни амалга оширишдан тийилиш, тўйларни тўхтатиш, дафн маросимларини соддалаштириш ва муҳим бўлмаган барча оммавий тадбирларни қисқартириш тавсия этилмоқда.
Аҳолининг миграциясини ҳам тутиб туриш бўйича чоралар кўриляпти. 3 ноябрь куни Пекиндаги «Дасин» аэропортининг режалаштирилган рейсларини 60 фоиздан ортиғи, «Пойтахт» аэропортининг эса қарийб 50 фоизи бекор қилинган. 2 ноябрь куни 109 кишида коронавирус аниқланган бўлса, уларнинг 16 нафар Хитойга хориждан келганлардир.
Пандемия бошланганидан буён Хитойда 97 423 кишида коронавирус аниқланган, 4636 киши вафот этган, 91 787 киши соғайган.
Аввалроқ Хитой АҚШ разведкасининг COVID-19 келиб чиқиши ҳақидаги хулосаларини ёлғон ва илмий жиҳатдан асоссиз деб атагани, ЖССТ раҳбари коронавирус пандемияси устидан ғалаба қозониш имкониятини баҳолагани тўғрисида хабар берилганди.
Изоҳ (0)