Тошкентда ерни ноқонуний олиб бермоқчи бўлган хонанда ДХХ томонидан қўлга олинди

ДХХнинг Бош прокуратура ҳузуридаги иқтисодий жиноятларга қарши курашиш департаментининг Тошкент шаҳар бошқармаси билан ҳамкорликда ўтказган тезкор тадбири давомида фирибгарлик билан боғлиқ ноқонуний ҳолатга чек қўйилди.

Хусусан, хориждан автомашиналар олиб келиб, сотиш билан шуғулланувчи, Тошкентда яшовчи 40 ёшли шахс Тошкент вилоятининг Юқоричирчиқ туманида жойлашган фермер хўжалик раҳбари билан келишиб, ўзганинг ишончига кирган ва мазкур хўжаликнинг 16,5 гектар суғориладиган ерини унинг номига расмийлаштириб бериш эвазига 600 минг доллар талаб қилган. Бу ишга улар 34 ёшли шахсни ҳам жалб қилган.

Ўтказилган тезкор тадбир давомида улар сўралган пулни олган вақтларида ашёвий далиллар билан ушланган.

Тошкентда яшовчи 58 ва 46 ёшли икки фуқаро тадбиркорлик билан шуғулланмоқчи бўлган шахснинг ишончига кириб, унга «коврак» ўсимлиги етиштириши учун Қашқадарё вилоятининг Деҳқонобод тумани ўрмон хўжалиги ҳудудидан 1000 гектар ер ажратилишида ёрдам беришларини айтиб, эвазига 300 минг доллар талаб қилган.

ДХХнинг Қашқадарё вилояти бўйича бошқармаси ходимларининг вилоят прокуратураси ҳамда иқтисодий жиноятларга қарши курашиш департаментнинг ҳудудий бошқармаси билан ҳамкорликда Қарши шаҳрида ўтказган тезкор тадбири давомида мазкур шахслар сўралган пулни олган вақтларида ашёвий далиллар билан ушланган.

Терговолди суриштирув ҳаракатлари давомида улар ушбу ноқонуний ишни ўзини гўёки Ўрмон хўжалиги давлат қўмитаси инспектори деб таништирган, 1988 йил Қаршида туғилган, ҳозирда Тошкентда истиқомат қилиб, аслида хонандалик билан шуғулланувчи, муқаддам судланган шахс билан 80 минг доллар эвазига ҳал қилишга ўзаро келишиб олгани маълум бўлган ва тезкор тадбир давом эттирилиб, Тошкентда дастлабки 24 минг долларни олган вақтида у ҳам қўлга олинган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.