«Қонунбузилиш ҳолатлари ҳақида хабар келиб тушмади» — Марказий сайлов комиссияси раиси

Марказий сайлов комиссияси раиси Зайниддин Низомхўжаев 24 октябрь куни Тошкент вақти билан соат 08:00 да бошланган президент сайлови қонунчилик ва демократик тамойилларга асосланган ҳолда бўлиб ўтаётганини маълум қилди, деб хабар бермоқда «Gazeta.uz».

«Эрталаб соат 08:00 да мамлакатимизда ташкил этилган 10 761 та сайлов участкасида Ўзбекистон Республикаси давлат мадҳияси янгради ва сайловчилар овоз беришга киришди. Жараён коронавирус пандемияси билан боғлиқ санитария-гигиена талабларига амал қилган ҳолда олиб борилмоқда», — деган у Тошкентда ўтказилган брифингда.

«Сайловлар Конституцияга жорий йилда киритилган ўзгартиришлардан сўнг биринчи марта октябрь ойида ўтказилмоқда. 14—20 октябрь кунлари муддатидан олдин овоз бериш бўлиб ўтди, унда 421 618 киши иштирок этди.

Дунёнинг 37 та мамлакатида 54 та сайлов участкаси ташкил этилди. Биринчи навбатда шарқдаги — Япония, Жанубий Корея, Хитой, Малайзия, Сингапур, Индонезия, Таиланд, Ҳиндистон ва Россиянинг Узоқ Шарқида сайлов участкалари очилди.

Рўйхатдан ўтган сайловчиларнинг умумий сони 19 миллион 859 минг 127 нафарни ташкил этмоқда. Марказий сайлов комиссияси раиси бешта сиёсий партиядан номзодлар илк бор иштирок этаётган сайловолди ташвиқотида партиялар томонидан қонунбузилиш ҳолатлари қайд этилмаганини билдирган.

Сайловни 971 нафар халқаро кузатувчи, жумладан, халқаро ташкилотлардан 631 нафар ва хорижий давлатлардан 340 нафар кузатувчи кузатмоқда. Шунингдек, партиялардан 53 700 нафар, фуқароларнинг ўзини ўзи бошқариш органларидан 10 700 нафар кузатувчи рўйхатга олинган.

Сайлов жараёнини маҳаллий ва хорижий ОАВларнинг 1670 вакили ёритмоқда.

Зайниддин Низомхўжаев сайлов қонунчилиги бузилиши ҳолатларини аниқлагудек бўлса, суд, прокуратура органлари ёки маҳаллий сайлов комиссияларига мурожаат қилиш мумкинлигини маълум қилган. Барча сайлов участкаларида қонунбузилиш ҳолатлари юзасидан мурожаатлар учун телефонлар мавжуд.