“Adolat” sotsial-demokratik partiyasidan prezidentlikka nomzod Bahrom Abduhalimov Shayxontohur tumanidagi 132-maktabda tashkil etilgan 405-saylov uchastkasida ovoz berdi. “Daryo” muxbirining xabar berishicha, unga oila a’zolari — rafiqasi, o‘g‘li, qizi, kelini va nevaralari hamrohlik qilgan.

Foto: “Daryo” / Ma’murjon Obrahmatov

Foto: “Daryo” / Ma’murjon Obrahmatov

Foto: “Daryo” / Ma’murjon Obrahmatov

Foto: “Daryo” / Ma’murjon Obrahmatov

Foto: “Daryo” / Ma’murjon Obrahmatov

Foto: “Daryo” / Ma’murjon Obrahmatov

Ma’lumot uchun, Bahrom Abduhalimov 1959-yil 27-fevralda Toshkent shahrida ishchi oilasida tug‘ilgan. Millati — o‘zbek. Ma’lumoti — oliy. 1981-yilda Toshkent davlat universiteti (hozirgi O‘zMU)ning Sharq fakultetini tamomlagan. Ixtisosligi — filolog-sharqshunos, arab va ingliz tillari o‘qituvchisi. Tarix fanlari doktori, professor.

Mehnat faoliyatini 1981-yilda Liviya Arab Respublikasida arab tili tarjimonligidan boshlagan. 1983—1987-yillarda O‘zbekiston Fanlar akademiyasi Sharqshunoslik institutida kichik ilmiy xodim, 1987—1990-yillarda harbiy xizmatni Yaman Arab Respublikasida harbiy tarjimon vazifasida o‘tagan.

Bahrom Abduhalimov 1990—1992-yillarda O‘zbekiston Fanlar akademiyasi Sharqshunoslik institutida ilmiy xodim, 2002—2003-yillarda direktor o‘rinbosari, 2003—2004-yillarda Toshkent shahridagi Xalqaro Vestminster universitetining prorektori, 2004—2006-yillarda Fanlar akademiyasi Sharqshunoslik instituti direktori, 2006—2008-yillarda O‘zbekiston prezidentining millatlararo munosabatlar masalalari va din ishlari bo‘yicha Davlat maslahatchisi lavozimlarida ishlagan.

2008-yildan Fanlar akademiyasi Sharqshunoslik institutida direktor, 2011-yildan Fanlar akademiyasi Ijtimoiy-gumanitar fanlar yo‘nalishi bo‘yicha vitse-prezidenti, 2020-yildan “Adolat” sotsial-demokratik partiyasi Siyosiy Kengashi raisi lavozimlarida faoliyat yuritib kelmoqda. U 2020-yilda “Mehnat shuhrati” ordeni bilan taqdirlangan.

Oilali — ikki o‘g‘il, bir qizi, uch nafar nevarasi bor. Rafiqasi T.Abduhalimova — uy bekasi.