Вашингтон Хитой билан совуқ урушни хоҳламайди, бироқ ўз позициясидан ҳам чекинмайди. Бу ҳақда АҚШ президенти Жо Байден Балтимор шаҳрида (Мериленд штати) жамоатчилик билан ўтказилган учрашувда маълум қилди, деб хабар беради «ТАСС».

Фото: EPA

«Мен Си Цзиньпин билан кўп гаплашдим ва у билан бошқа етакчиларга қараганда кўпроқ вақт ўтказдим. Одамларнинг Байден Хитой билан янги совуқ урушни бошламоқчи, деган гапларини эшитгансиз. Хитой билан совуқ урушни хоҳламайман. Мен Хитой тушунишини истайман: биз ортга чекинмаймиз, бирор қарашимизни ўзгартирмаймиз», — дейди АҚШ президенти.

Оқ уй раҳбарининг сўзларига кўра, Россия, Хитой ва қолган давлатлар АҚШ энг яхши қуролли кучларга эга эканини билади. «Улар (АҚШнинг рақиблари — таҳр.) кучайиб кетишидан хавотирланманг, улар жиддий хатога олиб келадиган ҳаракатни амалга ошириб қўйиши мумкинлигидан хавотирланиш керак.

Байденнинг таъкидлашича, Тайванга ҳужум хавфи туғилгудек бўлса, Вашингтон оролнинг хавфсизлигини таъминлашга тайёр. У «Хитой ҳужум уюштирса, АҚШ Тайванни ҳимоя қилишга тайёрми?», деган саволга жавоб қайтарган: «Ҳа, буни амалга ошириш бўйича мажбуриятимиз бор».

Аввалроқ The Wall Street Journal АҚШ махсус операция кучлари ва Денгиз пиёдалари корпуси контингенти Тайванда маҳаллий қўшинларни махфий равишда ўқитаётгани ҳақида хабар берганди.  Таъкидланишича, АҚШ махсус операция кучларининг 20 га яқин ходими Тайван қуруқлик қўшинларининг кичик гуруҳини шуғуллантирмоқда. Денгиз пиёдалари, ўз навбатида, маҳаллий денгиз флоти билан ишлаяпти. Нашр манбасининг аниқлик киритишича, АҚШ ҳарбийлари Тайванда камида бир йилдан буён бўлиб турибди.

Маълумот учун, 1949 йилда фуқаролар урушида мағлуб бўлган Чан Кайши (1887—1975) раҳбарлигидаги Гоминдана кучларининг омон қолган қисми Тайванга қочган ва ҳудуд ўз администрацияси томонидан бошқарилади. Тайван шундан буён ўз байроғи ва коммунистлар бошқарувга келгунигача алоҳида давлат бўлган Хитой Республикасидан қолган бошқа рамзларини сақлаб қолган. Пекин оролни Хитой провинцияларидан бири деб ҳисоблайди.

АҚШ Тайван билан 1979 йилда дипломатик муносабатларни узган ва уни Хитой билан ўрнатган. «Ягона Хитой» сиёсатини тан олувчи Вашингтон, шу билан бирга, Тайбей администрациясини қўллаб-қувватлашни ва оролга қуроллар етказишни давом эттириб келмоқда.