«Тошкент метрополитени» ДУК бошлиғининг рақамлаштириш бўйича ўринбосари лавозимига чет эллик мутахассис жалб қилинади. Бу ҳақда Президентнинг метрополитен фаолияти самарадорлигини ошириш тўғрисидаги 16 октябрдаги қарорида белгиланган.
Бундан ташқари, метрополитен фаолиятини ривожлантириш ва самарадорлигини ошириш стратегиясини ишлаб чиқиш учун илғор хорижий тажрибага эга консультантларни жалб этиш режалаштирилган.
Метрополитен фаолияти самарадорлигини оширишнинг асосий йўналишлари этиб қуйидагилар белгиланган:
- хорижий тажрибага асосланган замонавий бошқарув механизмларини жорий этиш;
- инфратузилмани модернизация қилиш ва ҳаракатланувчи таркибни босқичма-босқич янгилаш;
- хавфсизлик тизимини такомиллаштириш орқали йўловчилар ва ҳаракат хавфсизлиги даражасини ошириш;
- ерусти йўловчилар ташиш транспорти йўналишлари тармоғини метрополитен тармоғи билан бирлаштириш;
- соҳани малакали кадрлар билан таъминлаш.
Ҳужжат билан, шунингдек, 2022 йил 1 октябргача 6 та метро бекати атрофида автотураргоҳлар ташкил этилиши белгиланган. 2022 йил 1 апрелгача ерусти ҳалқа метро бекати йўналишида йўловчилар учун бепул Wi-Fi тизимини боғлаш ва ерости метро бекатларида мобил алоқа операторлари хизматларидан фойдаланиш имкониятлари яратилади. Ерости ва ерусти метро бекатларида савдо ва хизмат кўрсатиш майдончалари ташкил этилади.
2021 йил охиригача Тошкент метрополитени учун 5 та, 2022 йилда 14 та тўрт вагонли метро поезди харид қилинади ва поездларнинг сони 80 тага етказилади. Натижада метро поездларининг ўртача ёши 38 ёшдан 26 ёшга қисқаради.
Изоҳ (0)