Тошкентнинг Олмазор туманида жойлашган банкоматдан қарийб 400 миллион сўм ўғирлаган бир гуруҳ шахслар қўлга олинди. Бу ҳақда пойтахт ИИББ матбуот хизмати хабар берди.
Олмазор тумани ИИО ФМБдан келиб тушган хабарга кўра, 9 октябрдан 10 октябрга ўтар кечаси номаълум шахслар банклардан бирининг банкоматини очиб, ундан ичида 396 миллион 300 минг сўм бўлган 3 та қутини олиб кетган. Мазкур факт асосида Жиноят кодексининг 169-моддаси (ўғрилик) бўйича жиноят иши қўзғатилган.
Тошкент шаҳар ИИББ жиноят қидирув ходимлари томонидан кўрилган чоралар натижасида гумонланувчилар — 25 ёшли А.А., 28 ёшли М. А., 26 ёшли У.А. ва 25 ёшли М.М. қўлга олинган.
Айни пайтда тергов давом этмоқда.
Октябрь ойининг бошларида Тошкентнинг «Авиасозлар» даҳасидаги банкоматлардан бирини бузиб, ичидан 165 миллион сўм ўғирлаган 24 ёшли шахс қўлга олингани ҳақида хабар берилган эди. Шундай ҳолат август ойида ҳам юз берганди. 21 ёшли йигит Яшнобод тумани Паркент кўчасида жойлашган банкоматни бузиб, пулларни ўғирламоқчи бўлганида қўлга олинган. Март ойида эса Миробод туманидаги банкоматларнинг биридан пул маблағларини ўғирлашга уринган 26 ёшли йигит қўлга тушганди.
Изоҳ (0)