Таълим соҳасига ва ёшларнинг таълим жараёнига рақамли технологияларни жорий этишга доимий эътибор қаратган ҳолда, Huawei компанияси Ўзбекистондаги таълим муассасаларида бир қатор лойиҳаларни ишга туширди.
Huawei компанияси етти йилдан буён мамлакатда амалга оширилиб келаётган ҳар йилги Seeds for the Future таълим лойиҳасига старт берди. Глобал флагманлик ўқув дастури биринчи марта 2008 йилда Таиландда ўтказилган эди ва бугунги кунга келиб, дунёнинг 130 та мамлакати ва минтақасидан 9000 нафар талабани ўз ичига қамраб олди. Ҳар йили лойиҳа доирасида Тошкент ахборот технологиялари университети (ТАТУ) нинг 10 нафар талабаси Хитойга икки ҳафталик амалиётга бориб, АКТ ечимлари бўйича чуқур билим олишди ва Хитой маданияти ва урф-одатларини ўрганишди.
Дунёдаги эпидемиологик вазият туфайли 2020 йилда лойиҳа онлайн форматга ўтди, бу эса IT-технологияларга қизиққан ёшларни лойиҳага кўпроқ қамраб олиш имконини берди. Ўтган йили ТАТУнинг барча филиалларидан бўлган иштирокчилардан ташқари, Тошкентдаги ИНҲА университети талабалари ва Муҳаммад ал-Хоразмий номидаги ихтисослаштирилган ахборот-коммуникация технологиялари мактаби ўқувчилари ҳам дастурга қўшилишди.
Бу йил Seeds for the Future лойиҳаси бир вақтнинг ўзида IT йўналишидаги 5 та университет — ТАТУ, ИНҲА, Amity университетлари, шунингдек, Yeoju ва Турин политехника институтлари талабаларини ўзида бирлаштиради. Лойиҳа жорий йилнинг ноябрь ойида Huawei компаниясининг Тошкентдаги офисида штаб-квартиранинг кўмагида, гибрид форматда бўлиб ўтади. Муҳаммад ал-Хоразмий номидаги АКТ мактаби ўқувчилари ҳам 2021 йилги дастурга қўшилишади ва махсус ташкил этилган ҳакатонда иштирок этишади.
Huawei олий таълим муассасалари билан бир қаторда, Тошкент ирригация ва қишлоқ хўжалигини механизациялаш муҳандислари институти қошидаги International House Tashkent академик лицейининг ҳам узоқ муддатли ҳамкори ҳисобланади. Жорий йилнинг апрель ойида Huawei компаниясининг Ўзбекистондаги раҳбарияти International House Tashkent лицейи ва «Олий иқтисодиёт мактаби» миллий тадқиқот университети томонидан ҳамкорликда очилган иқтидорларни аниқлаш марказининг очилиш маросимида иштирок этди. Марказ фаолиятига илғор рақамли технологияларни жорий этиш мақсадида Huawei «жонли мулоқот» самарадорлигини сақлаб қолган ҳолда масофавий дарслар, маърузалар ва кенгашларни бемалол ўтказиш имконини берувчи Ideahub «ақлли» доскасини совға қилди.
Huawei, шунингдек, хитой тили чуқур ўрганиладиган 59-сонли ихтисослаштирилган умумтаълим мактабига бир неча йилдан буён доимий равишда кўмак бериб келмоқда. 2017 йилда 59-мактабда мактаб таълим тизимига smart технологияларни жорий этиш бўйича пилот лойиҳаси амалга оширилган эди, ўтган йили эса компания муассасанинг техник жиҳозланганлик даражасини яхшилаш мақсадида, мактаб ўқувчиларига ноутбуклар, смарт телевизорлар, принтерлар каби офис техникаларини ҳадя қилди. 2021 йил 12 октябрда 59-мактаб раҳбарияти ва Huawei компанияси хитой тилини энг яхши билиш бўйича мактаб ўқувчилари ўртасида иқтидорлиларни аниқлаш учун кўрик-танлов ўтказишни йўлга қўйиш тўғрисида меморандум имзоладилар. Октябрь ва ноябрь ойларида ўқувчилар лойиҳа ғолибларини аниқлаш учун ижодий топшириқларни бажарадилар.
«Компаниямиз учун Ўзбекистонда таълим лойиҳаларини ўтказиш ва қўллаб-қувватлаш барқарор ривожланишнинг устувор йўналишларидан бири ҳисобланади. Биз Seeds for the Future лойиҳаси ёки АКТ бўйича Huawei Cup минтақавий мусобақаларидаги каби рақамли кадрларни тайёрлаш учун IT соҳасидаги илғор билимларни ёшлар билан бўлишишга, шунингдек, IT соҳасидан ташқари бошқа турли йўналишларда ҳам, жумладан, 59-мактаб ва International House Tashkent лицейи билан ҳамкорликда ёш иқтидорларни қўллаб-қувватлашга интиляпмиз. Ҳозирги тиришқоқлик ва билимга интилиш келажакда кучли кадрлар захираси учун пойдевор бўлиб хизмат қилади», — дея таъкидлади Huawei компаниясининг Ўзбекистондаги директори Форрест Лю.
Реклама ҳуқуқи асосида.
Изоҳ (0)