ЎзЛиДеПдан президентликка номзод Шавкат Мирзиёев Тошкент вилоятида сайловчилар билан учрашувда вилоятнинг туризм салоҳиятини ривожлантириш борасидаги таклифлари билан бўлишди, деб хабар беради «Дарё» мухбири.
Давлат раҳбарининг сўзларига кўра, Ўзбекистонда қишки ва ёзги туризм учун чексиз имкониятга эга бўлган энг қулай ҳудуд – Тошкент вилояти ҳисобланади.
«Биргина мисолга аҳамият беринг, пойтахтнинг ўзидан вилоятга ҳафтасига 200-250 минг нафар аҳоли чиқади, бу ойига – қарийб 400 миллиард сўмлик тушум дегани. Шу боис вилоятда туризм салоҳиятини янги босқичга олиб чиқиш бўйича алоҳида дастурни амалга оширамиз. Авваламбор, Амирсой ва Чимён туристик мажмуаларида, Чорвоқ сув омбори ва Тошкент денгизи атрофида, Оҳангарон, Ангрендаги тоғли ҳудудларда қўшимча туристик зоналар ва дам олиш масканлари барпо этилишига 1 миллиард доллар инвестициялар жалб этилиб, 80 минг иш ўринлари яратилади», — дейди Шавкар Мирзиёев.
Давлат раҳбари Паркент туманини туризм маркази айлантириш мақсадида қатор таклифларни ҳам санаб ўтган:
- «Янги Ўзбекистон» боғидан Паркентнинг сўлим гўшаларига элтувчи 30 километр узунликдаги янги магистрал йўл қурилади;
- Тошкент шаҳридан Паркентга тезюрар автобуслар қатнови ташкил этилади;
- туман инфратузилмасига 100 миллиард сўм ажратилади;
- туманда туризм учун махсус солиқ режими жорий қилинади. Бунда тадбиркорлар уч йил давомида айланмадан олинадиган солиқ ва ижтимоий солиқни 1 фоиз ставкада, мол-мулк, ер, сув солиқларини ҳисобланган суммадан бор йўғи 1 фоизини тўлайди;
- йўл бўйларида савдо, умумий овқатланиш ва хизмат кўрсатиш объектлари барпо этилиб, камида 3 мингта янги иш ўрни ташкил этилади.
Аввалроқ Айдаркўл атрофида янги туристик ҳудудлар, соғломлаштириш масканлари қурилиши, Ўзбекистон The Times версияси бўйича дунёнинг энг гўзал масканлари қаторидан ўрин олгани тўғрисида хабар берилганди.
Изоҳ (0)