«Толибон» барча ҳарбийларни хизматга қайтишга чақирди
Афғонистонда ҳокимиятни эгаллаб олган «Толибон» ҳаракати томонидан тузилган вазирлар маҳкамаси аввалги ҳукумат даврида фаолият юритган муассасаларнинг барча ҳарбийлари ва ходимларини ишга қайтишга чақирди.«Аввалги режимнинг барча ходимлари — ҳарбийлар ҳам, оддий фуқаролар ҳам — ҳуқуқ-тартибот органларида хизмат қилишга қайтиш таклифини олди», — деди толиблар вакили, ИИВ матбуот котиби Қори Саид Ҳостий.
Кобулда хавфсизлик билан боғлиқ вазият ҳақида гапирар экан, бунинг учун бир қатор тузилмалар, шу жумладан, ИИВ, миллий хавфсизлик органлари ва махсус вазифали кучлар жавоб беришини таъкидлади.
Кобул чироқсиз қолди
Афғонистон шимолида юз берган авария туфайли Ўзбекистондан Кобулга электр етказиб бериш тўхтатилди. Шаҳар чироқсиз қолди. Айни пайтда электр токи фақат касалхоналарга ва давлат муассасаларига узатилмоқда.«Бағлон вилоятидаги Данди-Шаҳобиддин туманида кузатилган техник муаммолар туфайли Ўзбекистондан Кобулга етказиладиган электр таъминоти узиб қўйилди. Компания техник ходимлари муаммони бартараф қилиш билан шуғулланмоқда», — дея маълум қилишди Da Afghanistan Breshna Sherkat энергетика компаниясида.
Афғонистоннинг 150 дан зиёд ОАВлари ўз ишини тўхтатди
Афғонистонда журналистика ҳокимиятга «Толибон» келганидан кейин энг кўп талафот кўрган соҳалардан бирига айланди. Ўшандан буён камида 153 та оммавий ахборот воситаси ўз фаолиятини тўхтатган, хорижий нашрларнинг маҳаллий идоралари ҳам ёпилиб кетган.
Мамлакат иқтисодиётидаги инқирозли вазият туфайли кўплаб босма нашрлар молиявий қийинчиликларни деб тўлиқ онлайн-форматга ўтган ёки ёпилган.
«Кутилганидек, толиблар томонидан киритилишни бошлаган цензура сиёсати ҳам салбий таъсирини ўтказмоқда», — деди «ТАСС» манбаларидан бири. Human Rights Watch ҳуқуқни ҳимоя қилиш ташкилоти қайд этишича, «ислом қадриятларига ҳурмат билан муносабатда бўладиган» ОАВлар фаолиятига тўсқинлик қилмаслик ҳақида берган ваъдаларига қарамасдан, толиблар ўз қоидалари ва талабларини жорий қилмоқдаки, улар амалда матбуотнинг тўлақонли фаолиятига халал бермоқда.
Ижтимоий-сиёсий мавзуларни ёритувчи нашрларгина босим остида қолмаяпти, айнан кўнгилочар матбуот биринчи ўринда вазият қурбонларига айланди, чунки уларнинг контенти ислом қоидаларига зид бўлган.
«Толибон» халқаро стандартларга мос давлат яратишга интилмоқда
Толиблар Афғонистонда мамлакат эҳтиёжларига жавоб берадиган ва халқаро стандартларга мос бўлган сиёсий тузилмани яратишни кўзда тутмоқда, деди ташқи ишлар вазири вазифасини бажарувчи Амир Хон Муттақий.«‘Ислом амирлиги’ (толиблар ўз давлатини шундай атайди) дунёга ва минтақадаги мамлакатларга дўстона муносабатлар ҳақида сигнал юборди. Биз ҳеч қайси мамлакатнинг ички ишларига аралашишга интилмаймиз ва бошқалардан ҳам шуни кутамиз. Биз Афғонистоннинг жаҳон йўллари чорраҳаси сифатидаги салоҳиятидан тўлиқ фойдаланишга интиламиз», — деди у.
Мавзуга доир: Жаҳон ҳамжамияти «Толибон» Афғонистонда тузган ҳукумат билан ҳамкорлик қилишга тайёрми?
«Толибон» делегацияси Анқарада музокаралар ўтказади
Амир Хон Муттақий раҳбарлигидаги «Толибон» делегацияси Анқарага жўнаб кетди.ТИВ матбуот котиби Абдулқаҳҳор Балхийнинг сўзларига кўра, ташриф Туркия ташқи ишлар вазири Мавлуд Чавушўғлининг расмий таклифига кўра амалга оширилмоқда.
«Делегация Туркиянинг юқори мансабли вакиллари билан ўзаро манфаатли бўлган масалалар бўйича музокаралар олиб боради, — деб ёзди Балхий Twitter’да. — Алоқаларни яхшилаш, савдо, гуманитар ёрдам, миграция ва авиатранспорт соҳаларидаги ҳамкорлик бўйича қатор масалалар кўриб чиқилади».
Мавзуга доир: Эрдўғон «Толибон» билан мулоқот қилиш зарурлигини айтди
Изоҳ (0)