Ijtimoiy tarmoqlarda Andijon davlat tibbiyot instituti (ADTI) o‘qituvchilari va boshqa xodimlarining maoshlari hashar (shanbalik) uchun ushlab qolinayotgani haqida xabarlar tarqalgan edi.
7-oktabr kuni institut matbuot xizmati xabar berishicha, 21-avgust kuni institut hududida umumxalq xayriya hashari o‘tkazilgan, biroq xodimlarning ish haqqidan ushlab qolinmagan.
“Ijtimoiy tarmoqlarda tarqatilgan ma’lumotlar asossiz. Institutning birorta ham xodimi majburiy mehnatga jalb qilinmagan va ularning roziligisiz ish haqqidan ushlab qolinmaydi”, – deyiladi xabarda.
Andijon viloyati Adliya boshqarmasi vaziyatni o‘rganib chiqib, institut rektori Madamin Madazimovning 2021-yil 15-sentabrdagi buyrug‘ida “xodimlarning ish haqqidan hashar uchun o‘z ixtiyori bilan ushlab qolish” nazarda tutilgani aytilgan. Bu haqda Adliya vazirligi matbuot xizmati xabar berdi.
O‘zbekiston Respublikasi Mehnat kodeksining 164-moddasiga muvofiq, mehnat haqqidan ushlab qolishga xodimning yozma roziligi bilan, bunday rozilik bo‘lmagan taqdirda esa sud qaroriga asosan yo‘l qo‘yiladi.
Biroq institut rektorining yuqoridagi buyrug‘iga asosan 743 nafar xodimning sentabr oyi uchun oylik ish haqqidan 100-300 ming so‘mdan jami 150 million so‘m mablag‘ avgust oyida o‘tkazilgan hashar munosabati bilan ushlab qolingan bo‘lib, shundan 221 nafar xodimning ish haqqidan ularning roziligisiz pul mablag‘lari ushlab qolingan.
O‘rganish natijasida 150 million so‘m pul mablag‘i institut xodimlariga to‘liq qaytarilgan hamda qonun buzilishi holatlariga yo‘l qo‘ygan institutning mansabdor shaxslari intizomiy va ma’muriy javobgarlikka tortilgan.
Mavzuga doir:
- Andijonda uyida obodonlashtirish xodimlarini ishlatgan hokim o‘rinbosari 13,5 mln so‘m jarimaga tortildi
- Qashqadaryoda o‘qituvchilarni obodonlashtirish ishlariga jalb etgan maktab direktori 21,6 mln so‘m jarimaga tortildi
- Marg‘ilondagi maktabda o‘qituvchilar majburiy mehnatga jalb etilgani haqidagi xabarga munosabat bildirildi
Izoh (0)