Ўзбекистонда жиноий жавобгарликка тортиш ёшини 13 ёшдан 14 ёшга ошириш режалаштирилмоқда. Бу ҳақда Олий Мажлис Қонунчилик палатаси депутати, ЎзЛиДеП фракцияси аъзоси Расул Кушербаев маълум қилди.
Унинг билдиришича, Жиноят кодексига ўзгартириш киритишга доир ушбу мазмундаги қонун лойиҳаси қонунчилик палатасида кўриб чиқилмоқда. Президентнинг 9 августдаги «Бола ҳуқуқларининг кафолатларини таъминлаш тизимини янада такомиллаштириш тўғрисида»ги фармонига мувофиқ, жиноий жавобгарликка тортишнинг энг кам ёши ўн тўрт ёш қилиб белгилаш таклиф этилган.
«Хориж мамлакатлар, хусусан, Германия, Италия, Испания, Япония ва МДҲ мамлакатлари жиноят қонунчилигида жиноий жавобгарликка тортишнинг энг кичик ёши сифатида 14 ҳисобланади», — деб қайд этган депутат ва мазкур ўзгаришлар инсонпарварлик йўлидаги яна бир қадам эканлигини қўшимча қилган.
Амалдаги қонунчиликка кўра, жиноят содир этгунга қадар 13 ёшга тўлган шахслар жавобгарликни оғирлаштирадиган ҳолатларда қасддан одам ўлдирганлик (97-модданинг иккинчи қисми) учунгина жавобгарликка тортилади. Бошқа жиноятлар учун Жиноят кодексининг моддасидан келиб чиққан ҳолда жиноий жавобгарликка тортилиш учун энг кичик ёш 14, 16 ва 18 ёшни ташкил этади.
Эслатиб ўтамиз, Ўзбекистонда жавобгарликни оғирлаштирадиган ҳолатларда қасддан одам ўлдирганлик учун жавобгарликка тортиш ёшини 14 ёш этиб белгилаш 2021 йилнинг март ойида таклиф этилганди.
Изоҳ (0)