Жанубий Корея ҳукумати 2021 йилда Ўзбекистонда COVID-19 билан курашиш бўйича комплекс дастурни амалга ошириш учун 5 миллион доллар ажратди, ушбу маблағдан 4,57 миллион доллари соғлиқни сақлаш соҳасига йўналтирилади. Бу ҳақда Жанубий Кореянинг Тошкентдаги элчихонаси матбуот хизматига таяниб «Gazeta.uz» хабар берди.
Корея халқаро ҳамкорлик агентлиги (KOICA) томонидан амалга ошириладиган дастурнинг очилиш маросими 12 октябрь куни бўлиб ўтган. У Жанубий Корея Ташқи ишлар вазирлигининг «Кореянинг Тараққиёт учун расмий ёрдами: Ишончли муносабатларни қуриш» (ODA KOREA: Building TRUST) дастури доирасида амалга оширилади.
Тадбирда соғлиқни сақлаш вазирининг ўринбосари Абдулла Азизов, Санитария-эпидемиологик осойишталик ва жамоат саломатлиги хизмати раҳбари Баҳодир Юсупалиев, Тошкент тиббиёт академияси ректори Алишер Шодмонов, Жанубий Корея ташқи ишлар вазирининг кўп томонлама муносабатлар ва глобал масалалар бўйича ўринбосари Хам Санг Ук, элчи Кан Чже Квон, KOICA’нинг Ўзбекистондаги офиси директори Пак Сунжин, Корё университети профессори Чой Же Вук ва бошқалар иштирок этган.
Комплекс дастур доирасида KOICA Санитария-эпидемиологик осойишталик ва жамоат саломатлиги хизмати билан юқумли касалликлар профилактикаси ва уларга қарши кураш бўйича KOICA дастурини (1,6 миллион доллар) ҳамда Тошкент тиббиёт академияси билан юқумли касалликларни тадқиқ қилиш салоҳиятини ривожлантириш бўйича дастурни (300 минг доллар) амалга ошириш бўйича меморандумларни имзолаган.
2021 йилги дастурлар юқумлик касалликларни профилактика ва назорат қилишни бошқариш соҳасида салоҳиятни мустаҳкамлаш, юқумлик касалликлар диагностикаси билан шуғулланадиган лабораториялар учун сифат назорати тизимини яратиш, юқумли касалликлар ва вакцинацияни мониторинг қилиш миллий тизимини яратиш, коронавирус билан боғлиқ тадқиқотлар салоҳиятини мустаҳкамлаш, шунингдек, тиббий муассасаларга ускуналарни тақдим этиш орқали даволаш салоҳиятини мустаҳкамлаш ва бошқаларни ўз ичига олади.
Тадбир давомида KOICA Соғлиқни сақлаш вазирлигига 35 та туманлараро тез ёрдам марказига ўрнатиш учун 2,32 миллион долларлик 87 та кислород генераторини топширган.
Эслатиб ўтамиз, коронавирус инфекцияси тарқалишининг дастлабки босқичида Ўзбекистонга Жанубий Корея ҳам ёрдам кўрсатганди, хусусан, профессор Сой Чже Ук ва Юн Синг Жу каби малакали тиббиёт ходимлари мамлакатга маслаҳатчи сифатида келиб, эпидемияга қарши курашда маҳаллий мутахассисларга ёрдам берди.
2020 йил апрель ойининг якунида эса Жанубий Корея томонидан Ўзбекистонга умумий қиймати 250 минг АҚШ долларига тенг бўлган диагностика тўпламлари тақдим этилди. Июнь охирларида мамлакат коронавирусга қарши курашиш учун Ўзбекистонга 5 миллион доллар ажратганди.
Изоҳ (0)