Буюк Британиянинг собиқ бош вазири Маргарет Тэтчер ҳаёт бўлганида 13 октябрь куни 91 ёшни қаршиларди. Қатъияти, бўйсунмас феъл-атворга эга экани билан «темир хоним» деб аталган хоним 1979—1990 йиллар давомида, 11 йил мамлакатни бошқарган. Тэтчер мамлакатининг жаҳон аренасидаги имиджи шаклланишида муҳим рол ўйнаб, узоқни кўра оладиган ва доно сиёсатчи сифатида тарихда қолган. Сана муносабати билан ХХ асрнинг энг асосий сиёсатчиларидан ҳисобланган ушбу аёлнинг кийиниш услубидаги ўзига хосликларга назар ташлаймиз.

Костюмлар

Фото: Elle

Кийиниш услуби хилма-хиллиги билан ажралиб турмаганига қарамай, Маргарет нафақат Буюк Британия, балки бутун дунё аҳолиси айнан у билан боғлаб эслайдиган эсда қоларли образларни яратишнинг уддасидан чиққан. Кўп йиллар давомида унинг кийинишидаги асосий элементлар ўзгаришсиз қолган. У ўз образини классик силуэт ва жиддий чизиқларга урғу берадиган стилистлар ёрдамида яратган. «Темир хоним»га хос одатий услуб бу елка соҳасидаги чизиқлари кўзга ташланиб турадиган жакет ва узунлиги бироз тиззани ёпиб турадиган юбкадан иборат бўлган.

Кўк ранг

Фото: Elle

Кўк Маргарет Тэтчернинг энг севимли ранги бўлган. У оммавий тадбирларда оч мовий рангдан тортиб, тунги осмон кўринишигача бўлган кўк рангли либосларда кўп марта кўриниш берган. Кўк Буюк Британиядаги Консерваторлар партиясининг рамзи эканидан келиб чиқилса, мазкур рангга содиқлигини пиар билан боғлиқ бўлган деб ҳам ўйлаш мумкин.

Соч турмаги ва макияж

Фото: Elle

Маргаретнинг ташқи кўринишида асло палапартишлик бўлмаган. У оммага ҳеч қачон мукаммал соч турмаги ва тартибли макияж қилмай туриб кўриниш бермаган. Унинг либослари майда деталларигача яхшилаб ўйланган, Костюмлари қоматида мукаммал турган, аксессуарлари эса кийим рангига мосланган.

Романтик образлар

Фото: Elle

Фото: Elle

Кўпчилик аёлларга хос назокат ва жозибани унда мужассам бўлмаган деб ҳисоблаган. Аммо бу ҳақиқатдан йироқ. Тэтчер ҳам мафтункорликнинг ошуфтаси бўлган, у гўзаллик салонига бориш учун уйқусидан кечиши мумкин эди. Навбатдаги тадбир учун кийиладиган либосни эса соатлаб танлаган. Унинг услубида аёлларга хос романтик деталлар ҳам бўлган — у бўйин қисмида катта банти бор кофта кийишни яхши кўрган. Оқшом тадбирларида эса кўпинча ергача тушиб турадиган узун либосларда кўриниш берган.

Марваридли маржон

Фото: Elle

Тэтчернинг образи ўзгармас деталларсиз тўлиқ бўлмаган бўларди. У ҳамиша марварид ва йирик зиракли комплект таққан. Кўплаб йиллар давомида унинг кийиниш борасидаги мазкур диди ўзгармаган. Муҳим сиёсий мурожаат қилиш учун минбарга кўтарилганида ҳам бўйнида марварид бўлган, қолаверса, ушбу тақинчоғи бор образда қиролича Елизавета II билан кўришган.

Asprey сумкаси

Фото: Elle

Ушлайдиган қисми унча катта бўлмаган сумкалар унинг севимли аксессуари бўлган. Маргарет деярли ҳеч қачон улардан айрилмаган. Бу содиқлиги мода танқидчиларнинг турли фикрларига сабаб бўлса ҳам у кийиниш услубини ҳеч нимага қарамай ўзгартирмаган. Ундаги Asprey брендининг қора рангли модели «даҳшатли сумка» сифатида дунёга машҳур бўлган. Маргарет тўғри тўртбурчак шаклдаги мазкур сумкани Рональд Рейган ва Михаил Горбачёв билан музокараларига тутиб борган. Кейинчалик ушбу аксессуар аукционда 28 минг еврога сотилган.

Қўлқоп ва шляпалар

Фото: Elle

Калта қўлқоп ва турли-туман шляпалар «темир хоним»нинг образининг ажралмас қисми бўлган. Мазкур деталлар уни хилма-хил кўрсатган.

Фото: Elle

Сиёсий қарашларидан тортиб, шахсий ҳаёти ва ташқи кўринишигача бўлган ҳамма-ҳамма нарсада ўзига содиқ қолган Маргарет ранг танлови борасидаги фикрини ҳам ўзгартирмаган, ярқироқ ранглардан узоқ бўлган.