Исталган қомат эгаси ўзига хос кўриниши ва образи билан атрофдагиларни лол қолдириши мумкин. Бунинг учун энг асосийси камчиликларни яшириб, афзалликларга урғу беришни уддасидан чиқиш керак.
Костюм-шим
Мода ихлосмандларининг гардеробидан аллақачон жой олиб улгурган бир рангдаги костюм-шимлар тўладан келган аёл-қизлар учун айни муддао. Асосийси танлаш борасида айрим жиҳатларни инобатга олиш керак. Қадди-қомати нозик бўлмаган аёллар шимни тўғри бичимлисини танлаши керак. Бу уларнинг бўкса ва сонларидаги камчиликларни яширишга ёрдам беради. Стрелкали ёки исталган вертикал чизиқли моделлар ихчам кўриниш ва ортиқча килоларнинг кўзга ташланмаслигига ҳисса қўшади. Костюм эса кенг, ичидан водолазка ёки жемфер кийишга мўлжалланган бўлиши лозим. Аммо шу билан бирга янада тўла кўрсатмаслиги учун ҳаддан ортиқ кенг моделларга эътибор қаратиш тавсия қилинмайди.
Джинси
Озғин бўлмаган нозик жинс вакилларига этаклари кенг ёки бўксадан тўғри турадиган қилиб бичилган джинси шим моделларига эътибор қаратиш тавсия қилинади. Этаклари кенг шим айниқса, пошнали пойабзаллар билан ўзига хос кўринади. Уни қулай жемфер, романтик услубдаги блузка ва трендга хос свитерлар билан умумлаштирсангиз бўлади.
Трикотаж
Тўла аёллар кузги гардеробда ўз ўрнига эга бўлган трикотаж либос танлаганда, ундаги чоклар бўртмаганлигига эътибор қаратиши керак. Акс ҳолда одатдагидан ҳам қўпол кўриниб қолиш мумкин. Оддий трикотажнинг бироз ташлаб турадигани эса аксинча, камчиликларга урғу бермайди. Уни шим, юбка ва ҳатто юбка билан ҳам умумлаштирса бўлади.
Юбка ва кўйлак
Совуқ ҳарорат аёлларга хос назокатни унутиш учун сабаб бўла олмайди. Бир вақтнинг ўзида дилбар ва қулай кийиниш учун кўйлак устидан жемфер ёки свитер кийиб, пойабзал борасида ботинкаларга эътибор қаратиш тавсия қилинади. Плиссировкали юбка эса қоматнинг тўла қисмларини яширишга ҳисса қўшиши билан ўзига хос. Олд қисми «запах»ли вариантлар исталган қоматга мос тушиб жозибали кўрсатиши мумкин.
Устки кийим
Дўмбоқ аёллар учун узунлиги болдирга тушиб турадиган тренчлар айни муддао. Белбоғи бор вариантлар сарвқомат кўрсатишга ҳисса қўшади. Қолаверса, кўриниши халатни эсга соладиган, оддий бичимли ва тўғри узунликдаги пальто ҳам образни ўзига хос бўлишини таъминлайди. Бу билан чекланмасдан курткалар танлашингиз мумкин. Ҳаддан ортиқ oversize ва ёпишиб турадиган моделлардан қочиш, қоматдан келиб чиқиб танлов қилиш керак.
Пойабзал
Пойабзалнинг баланд ёки пошнасини танлаш ўзингизга ҳавола. Кундалик образлар учун ҳажмли спорт услубидаги оёқ кийимларга эътибор қаратинг. Этик ва ботильонларни эса юқори қисми оёқнинг энг кенг қисмида тугамаслигига эътибор беринг.
Сумка
Ихчам сумкалар уни тутган аёл ё қизнинг тўлалиги кўзга ташланишига сабаб бўлади. Бунинг ўрнига думалоқ геометрик ва шакли қопни эсга соладиган вариантларни харид қилинг. Ўртача катталикдаги қаттиқ сумка энг яхши вариант ҳисобланади.
Аксессуарлар
Ранг-баранг, принтли рўмоллар кузги образни янада қизиқарли бўлишини таъминлайди. Қолаверса, куз бош кийимларини кийиш учун ҳам айни муддао. Шляпа, беретка ва кепкалар исталган қомат эгасини ўзига хос кўринишига сабаб бўлади.
Мавзуга доир:
Изоҳ (0)