Apple CarPlay’ни янги даражага олиб чиқиш имконини берадиган янги лойиҳа устида иш олиб бормоқда. Интерфейсни iPhone билан интеграция қилувчи тизим кўплаб функцияларни бошқара олади, масалан, салондаги иқлим-назорат ва ўриндиқ қурилмаларини. Бугунги кунда IronHeart шартли номига эга лойиҳа дастлабки босқичда турибди, деб хабар беради Motor.
Манбаларнинг маълум қилишича, тизим автомобиль ичи ва ташқарисидаги ҳароратни ўлчашга, аудиотизим, ўриндиқлар электр узатмалари ва тирсакости тизимларини бошқариш имкониятига эга, шунингдек, спидометр ва тахометрни, ёнилғи даражасини кузатади.
Шундай қилиб, тайёрланаётган CarPlay версияси деярли бутун автомобилни эгаллайди ҳамда Apple интерфейси ва ўрнатилган тизим ўртасида биридан иккинчисига ўтиш заруратини бартараф этади. Бу каби қадам iPhone эгалари учун машина билан ўзаро алоқани янада қулайлаштиради, бироқ Bloomberg’нинг ҳисоблашича, у автомобиль ишлаб чиқарувчилар орасида кутилганидек машҳурликка эришмайди.
2014 йилда тақдим этилган CarPlay тизимини ҳозирда 600 та автомобиль қўллаб-қувватлайди. У бундан олдин ҳам ахборот-кўнгилочар функция чегарасидан чиқишга уринган: 2019 йилда янгиланган CarPlay рақамли қурилмалар панели билан ишлашни бошлаган, 2020 йилда эса iPhone ёки Apple Watch соатлари ёрдамида автомобиль қулфини очиш имконини берадиган CarKey ишга туширилган. Бундан ташқари, iPhone электрокар турган жой ва ундаги батарея қуввати даражасини кузатишни ўрганиб олган.
Автокомпаниялар Apple’га барча янги тизимларни назорат остига олишига рухсат беравермайди. CarPlay имкониятларидан фақатгина бир нечта марка фойдаланиб келади, жумласан, BMW ва Volkswagen.
Аввалроқ Apple’нинг биринчи автомобили 2024 йилдан олдин тақдим этилмаслиги маълум бўлганди — компанияга ишлаб чиқаришни нолдан бошлаб йўлга қўйиш учун вақт керак.
Изоҳ (0)