Ўзбекистон ҳукумати Coca-Cola Bottlers Uzbekistan (CCBU) компаниясидаги давлат улушини сотиш тўғрисидаги битимни имзолади. Битимни имзолаш маросими 29 сентябрь куни Тошкентда ўтказилаётган Иқтисодий форум доирасида бўлиб ўтган. Бу ҳақда Молия вазирлигига таяниб, «Gazeta.uz» хабар берди.
Маълум қилинишича, 57,118 фоизга тенг бўлган давлат улушини Coca Cola İçecek А. Ş. (CCI, Туркия) компаниялар гуруҳи унга тўлиқлигича қарашли бўлган CCI International Holland B.V. шўъба корхонаси орқали 252,28 миллион долларга сотиб олган. Компаниядаги қолган 42,88 фоиз улуш The Coca Cola Export Corporation’га тегишли. Шундай қилиб, Ўзбекистондаги алкоголсиз газли ичимликлар ишлаб чиқарувчи мазкур компания тўлиқ хусусий сектор тасарруфига ўтди.
Битим Давлат мулкини сотишда тендер савдоларини ўтказиш бўйича Давлат комиссияси томонидан 6 августда маъқулланган эди. Шунга қарамай, битимни якунлаш жараёни тартибга солувчи органлар томонидан бериладиган муайян рухсатлар олинишини талаб қилиши айтилган эди.
Молия вазирлигининг хабар беришича, 29 сентябрь куни бўлиб ўтган форум доирасида тегишли ва божхона рухсатномалари, шу жумладан, давлат рухсатномаларини олиш билан хусусийлаштириш расман якунланган.
Spot нашрининг Bigpara (Hurriyet турк нашрининг бир қисми) маълумотларига таяниб ёзишича, CCI’нинг 351 022 та акция учун тўловни нақд пулда амалга оширган.
CCI бош директори Бурак Башарирнинг сўзларига кўра, компания CCBU’нинг назорат пакетига эга бўлиш имкониятидан мамнун.
«Бу битим бизнинг Coca-Cola тизимидаги энг кучли ҳамкорлардан бири сифатидаги позициямизни мустаҳкамлайди. Бу, шунингдек, FMCG бўйича минтақада энг яхши ўйинчи бўлиш мақсадимизга хизмат қилади… Шунингдек, биз Ўзбекистон алкоголсиз ичимликлар бозорининг қисқа ва ўрта муддатли истиқболда барқарор ва даромадли ўсишининг улкан салоҳиятига ишонамиз», — дейди у.
Давлат активларини бошқариш агентлиги директори Акмалхон Ортиқовнинг таъкидлашича, мазкур битимни хусусийлаштиришнинг илк муваффақиятли намуналаридан бири деб ҳисоблаш мумкин.
Coca-Cola Bottlers Uzbekistan — Ўзбекистондаги йирик газланган алкоголсиз ичимликлар ишлаб чиқарувчиси ҳисобланиб, Тошкент, Наманган ва Урганчда ишлаб чиқариш қувватлари ва омборлари мавжуд. 2020 йил якунлари бўйича компаниянинг соф даромади 205 миллиард сўмни ташкил этган.
Coca-Cola İçecek эса Coca-Cola тузилмасидаги йирик корхоналардан ҳисобланади. Унинг асосий эгалари Anadolu Efes ва The Coca-Cola Company.
Эслатиб ўтамиз, 2018 йилда Ўзбекистон ҳукумати Coca-Cola Ichimligi Uzbekiston Ltd ҚКдаги улушини хорижий инвесторга сотмоқчи эканлиги маълум қилинган эди. Европа тикланиш ва тараққиёт банки битимда воситачи сифатида иштирок этиши керак эди. Бироқ кейинроқ мамлакат ҳукуматининг устувор режалари ўзгаргани сабаб жараён тўхтаб қолган эди. 2020 йилнинг март ойида эса Coca-Cola Ўзбекистонга 31 миллион доллар инвестиция киритишни режалаштираётгани, июнь охирларида эса Coca-Cola компанияси оммавий савдолар асосида хусусийлаштирилиши тўғрисида хабар берилганди. 2020 йилнинг августида эса Coca-Cola’нинг давлат улуши иккинчи маротаба сотувга қўйилганди.
Изоҳ (0)