Ўзбекистон Экологик партиясидан президентликка номзод Нарзулло Обломуродов 25 сентябрь, шанба куни сайловчилар билан учрашиш, яқиндан мулоқот қилиш учун Самарқанд вилоятига борди. Учрашув вилоят қурилиш бошқармаси залида бўлиб ўтди.
Албатта, партия ва унинг раиси янги бўлганлиги сабабли Экопартия президентликка кўрсатган номзод кўпчиликка нотаниш бўлиши мумкин. Шу сабабли учрашув аввалида унинг қисқача таржимаи ҳоли билан таништириб ўтилди. Хўш, Нарзулло Обломуродов ҳақида нималарни биламиз?
Нарзулло Обломуродов Япония ва Европа иттифоқидаги ривожланган давлатларнинг олий таълим муассасаларида ўқиган ҳамда у ердаги илмий марказларда малака оширган. Унинг амалга оширган лойиҳалари ҳам партия ғоясига мос. Хусусан, у охирги 10 йилликдаги энг долзарб муаммо бўлиб турган, Оролбўйи ҳудуди муаммоларини ечишга қаратилган қатор лойиҳалар муаллифи ҳисобланади. «Мўйноққа мадад» хайрия веломарафони, «Дарахт экинг» акцияси, экологик инновациялар ва яшил технологиялар танлови шулар жумласидандир.
Йиғилишда сўзга чиққан Нарзулло Обломуродов ҳудуддаги сайловчиларни, умуман республика бўйлаб кўплаб аҳолини қийнаб турган муаммонинг ечимини айтиб ўтди. Чекка қишлоқлардаги электр энергияси ва сув таъминотидаги камчиликлар барчага аён. Унинг сайловолди дастуридан айнан шу муаммоларнинг ечими ўрин олган. Хусусан, қайта тикланувчи энергия манбаларидан фойдаланган ҳолда олис қишлоқлардаги сув таъминотини ошириш кўзда тутилган.
«Қайта тикланувчи энергия манбаларидан фойдаланган ҳолда сувни чучуклаштирувчи локал қурилмалар барпо этиш орқали олис қишлоқ жойларда сув таъминоти сезиларли даражада яхшиланади», — дейди Нарзулло Обломуродов.
Обломуродовнинг таъкидлашича, экологик муаммоларни ҳал қилиш бир кишининг ёки ҳукуматнинг қўлидан келмайди, аҳолининг қарашлари ҳам ўзгариши керак.
«Атмосферага чиқаётган заҳарли моддаларнинг олдини олиш учун кундалик ҳаётимизда табиатга бўлган муносабатимизни ўзгартиришимиз керак. Энг катта хатомиз — биз кимдир қилиб бериши керак, деб яшаймиз. Аслида, ўзимиз ҳаракат қилишимиз керак. Айнан шунинг учун биз экология, аҳоли саломатлиги йўлида одамларнинг фикрини ўзгаритишга ҳаракат қиляпмиз», — деди Нарзулло Обломуродов.
Табиийки, Экопатиядан сайланган президент фақатгина экологик муаммолар билан шуғулланмайди, бошқа масалалар ҳам бор. Нарзулло Обломуродов электрон ҳукумат ва давлат хизматларига ҳам тўхталиб ўтди.
«Аҳолига қулайлик яратиш мақсадида электрон ҳукумат тизими янада кенг жорий этилади. Давлат хизматларини кўрсатиш самарадорлиги оширилади. Бу ишлар пандемия даврида пайдо бўлган узун навбатларнинг олдини олади», — деб айтди президентликка номзод.
Соғлом ва тоза келажак учун Ўзбекистон Экологик партиясидан кўрсатилган Нарзулло Обломуродов номзодига овоз беринг.
Реклама ҳуқуқи асосида.
Изоҳ (0)