Лондондаги «Тоттенҳэм Ҳотспур» стадионида Тошкент вақти билан 25 сентябрдан 26 сентябрга ўтар кечаси катта бокс оқшоми бўлиб ўтади.

Фото: Getty Images

Мусобақанинг асосий жангида супер оғир вазн тоифасида WBA, WBO, IBF ва IBO камарлари соҳиби Энтони Жошуа (24-1, 22 КО) ва Олександр Усик (18-0, 13 КО) ўзаро тўқнаш келади.

Бокс оқшоми Тошкент вақти билан 25 сентябрь куни 22:00 да бошланади. Ушбу бокс кечасидан 7 та жанг ўрин олган. Усик — Жошуа жанги эса энг сўнгиси бўлади. Марказий жанг тахминан тунги соат 02:00 дан кейин бошланади.

Ушбу мусобақа Ўзбекистон телеканаллари орқали намойиш этмайди. Жанг видеоларини бу ерда томоша қилиш мумкин — ҳавола.

Мусобақанинг бошқа асосий жанглари рўйхати билан танишинг:

  • Лоуренс Околи (16-0, 13 КО) — Дилан Прашович (15-0, 12 КО).
  • Каллум Смит (27-1, 19 КО) — Ленин Кастильо (21-3-1, 16 КО).
  • Кемпбелл Ҳаттон (3-0, 0 КО) — Сонни Мартинес (2-4, 0 КО).

Маълумот учун, британиялик 31 ёшли боксчи сўнгги жангини 2020 йилнинг декабрида Кубрат Пулевга қарши ўтказиб, 9-раунддаги нокаут эвазига ғалаба қозонганди. Жошуа фаолияти давомида Диллиан Уайт (2015), Владимир Кличко (2017) ва Александр Поветкин (2018) каби машҳур боксчиларга қарши жанг қилиб, ғалаба қозонган. У фаолиятидаги ягона мағлубиятни 2019 йил Энди Руисга қарши жангда қабул қилиб олган, бироқ ўша йилнинг ўзида ундан реванш олганди.

34 ёшли Усик 2019 йилда оғир вазн тоифасига ўтган. Бу вазндаги илк жангини 2019 йил 10 октябрида Чазз Уизерспунга қарши ўтказиб, очколар эвазига ғалаба қозонган. Иккинчи жангини эса 2020 йил 31 октябрида Дерек Чисорага қарши ўтказиб, очколар эвазига ғалабани қўлга киритган.