«Шифокорлар тузалмайсан, дейишганди». «Тоҳир ва Зуҳра» фильми юлдузи Паризода бир неча йил оғир дард билан курашгани ҳақида гапириб берди (видео)

«Тоҳир ва Зуҳра» фильмининг янги талқинидаги Зуҳра образи орқали танилган актриса Паризода Бўрихўжаева «Севимли» телеканалининг «Ўзим» лойиҳасида бир неча йил аввал оғир касалликка чалингани, шифокорларнинг қўрқинчли ташхисига қарамай соғайиб кетгани ҳақида гапирди.

Қийинчиликлар ҳаммада бўлади. Тахминан 25 ёшларимда, шу турмушга чиққанимдан бир неча йилдан сўнг соғлиғим билан муаммолар бўлган. Бу синов ҳаётимни жуда қаттиқ ўзгартирган. Ўша вақтда докторлар «Йўқ сиз тузалиб кетмайсиз, бу нарса тузалмайдиган касал», дейишганди. Бу муаммо нафақат мен учун, балки тепадан бутун оилам учун берилган. Касаллик туфайли ким қанақалигини, менга қанақа муносабатдалигини билдим. Ўша пайтда турмуш ўртоғим ва яқинларим мени қандай эъзозлашини кўрдим.

Отамнинг бир гаплари бор: «Синов ҳам одамнинг кучига қараб берилади». Кучли одамга кучли синов берилади. Заифроқ инсонга енгилроғи берилади. Мен табиатан қўрқоқ одамман, баландлик ва тезликдан қўрқаман. Лекин ўша пайтда ичимдан «ҳали тузалиб кетаман, ҳаммаси яхши бўлади», деган катта куч топганман. Синовдан турмуш ўртоғим билан бирга ўтганмиз. У кунларни эсласам, кўзимга ёш келади. Шу ўринда фурсатдан фойдаланиб, яқинларимга миннатдорчилик билдирмоқчиман.

Паризода Бўрихўжаева