«Ташкент сити» КВН бўйича Ўзбекистон терма жамоаси Халқаро КВН лигасининг ярим финалига чиқди. Чорак финал натижаларига кўра, ватандошларимиз 52 балл тўплаб, биринчи ўринни эгаллади. Беллашув 11 сентябрь куни Россиянинг Смоленск шаҳрида бўлиб ўтди. Халқаро КВН иттифоқининг расмий сайтида эътироф этилишича, мамлакатимиз жамоаси юморни шарқона колорит ва ўзгача дид билан тақдим этиб келмоқда.
Қуръа бизнинг жамоа мазкур босқичнинг тўртинчи куни иштирок этишини белгилади. Йигитларимиз қуйидаги бешта жамоага қарши беллашдилар: «Олег» ЖУрДУ (Челябинск), «Аквабатя» (Иваново), «Команда воспитателей детского сада ПК» (Ноябрьск), «Паша и Серёжа» (Тверь) ҳамда «Всё путём» («ДР» ИҲ, Донецк). Жамоалар «Таништирув», «Савол-жавоб» ва «Мусиқий чиқиш» шартлари бўйича ўз иқтидорларини намойиш этишди.
Юбилей мавсумининг чорак финал босқичида 26 жамоа 1/2 финал йўлланмаси учун курашди. 1/8 ҳамда 1/4 финалдаги очколар йиғиндиси бўйича 14 та жамоа ярим финалга чиқди. Шуни таъкидлаш жоизки, Ўзбекистон 29 йил ичида илк бор нуфузли юмористик мусобақанинг ярим финалига чиқишга муваффақ бўлди.
Терма жамоамиз ҳомийси Ўзбекистоннинг энг йирик ишлаб чиқариш холдинги — AKFA Group. Компания ўзбекистонлик КВН’чиларнинг асосий мақсади — мамлакат нуфузини ошириш ва ўзбек юморини дунёга танитишни қўллаб-қувватлаб келмоқда.
Маълумот ўрнида эслатиб ўтамиз, Халқаро КВН лигасида иштирок этиш ҳуқуқини жамоамиз 11—22 март кунлари Сочи шаҳрида бўлиб ўтган 32-Халқаро КВН фестивали «КиВиН-2021»да қўлга киритган эди. Мазкур фестиваль жорий йилда 15 дан ортиқ мамлакатлардан 300 дан кўпроқ жамоалар сафида 2000 га яқин ижодкор ёшларни ўзида жамлади. Фестиваль натижаларига кўра, «Ташкент сити» жамоаси телевизион лигалар учун танланган бир қатор энг яхши жамоалар қаторидан ўрин олган эди.
Халқаро КВН лигасининг ярим финали 29—30 октябрь кунлари Россиянинг Смоленск шаҳрида, «Губернский» маданий ҳордиқ чиқариш марказида бўлиб ўтади. «Ташкент сити» жамоасига омад ва ғалабаларни тилаб қоламиз.
Реклама ҳуқуқи асосида.
Изоҳ (0)