Молия вазири ўринбосари Аҳадбек Ҳайдаров 13 сентябрь куни бўлиб ўтган матбуот анжуманида келгуси йилларда солиқларнинг камайиши Ўзбекистон бюджети даромадларига қандай таъсир қилиши ҳақида маълумот берди. Бу ҳақда «Gazeta.uz» хабар қилди.
Президент Шавкат Мирзиёев сайловолди дастурида, 2023 йилдан ҚҚС 15 фоиздан 12 фоизгача, 2022 йилдан мол-мулк солиғи 2 фоиздан 1,5 фоизга, айрим тоифадаги тадбиркорлик учун даромад солиғи 20 фоиздан 15 фоизгача камайтирилишини маълум қилганди.
«Албатта, бу бюджет даромадларига етарлича таъсир қилади. ҚҚС ставкасини 15 фоиздан 12 фоизгача тушириш учун биз катта тайёргарлик ишларини кўришимиз керак. Биринчидан, ҚҚС бўйича берилган барча имтиёзларни бекор қилиш масаласи бор, шунингдек, ҚҚС йиғилишини, яъни [солиқ] маъмурчилигини ва бошқаларни такомиллаштириш бўйича чора-тадбирларни ишлаб чиқиш керак», — деди молия вазирининг ўринбосари.
Ҳайдаровнинг маълум қилишича, дастлабки ҳисоб-китобларга кўра, «катта йўқотишлар бўлмайди». Молия вазири ўринбосари солиқ тушумлари етишмаслигининг бир қисми юқоридаги чора-тадбирлар, шунингдек, яширин иқтисодиёт улушини камайтириш ҳисобига қопланишини кутмоқда.
«Даромад солиғи ставкасини 20 фоиздан 15 фоизгача пасайтириш тўғридан-тўғри йўқотишларга олиб келади. Аммо агар бу корхоналарнинг аксарияти давлат мулки эканини ҳисобга олсак, уларнинг дивидендлар кўринишидаги даромади ўсади.
Зарарларнинг бир қисми фақат дивидендлар бўйича солиқ билан қопланади. Қолаверса, бу корхоналарда ишлаб чиқаришнинг кенгайиши ҳисобига биз бошқа солиқлардан тушадиган даромадларни ошириш имкониятига эга бўламиз», — деди Ҳайдаров.
Изоҳ (0)