Тошкентда хизмат вақтида ухлаган ва турли номақбул ҳаракатлар қилган ЙПХ ходими ишдан олинди

Ижтимоий тармоқда «Тошкентда уйқудаги ГАИ» сарлавҳаси остида видео тарқалди. Ҳолат юзасидан ЙҲХББ текширув ўтказиб, натижасини эълон қилди.

Қайд этилишича, Тошкент шаҳар ИИББ ЙҲХБ ЙПХ ходими А.Жўрақулов хизмат фаолияти давомида интизомий жазолангани, якка тартибда профилактик суҳбатлар ўтказилганига қарамасдан ўзига тегишли хулоса чиқармаган.

Ўтказилган хизмат текширувига кўра, у хизмат давомида турли номақбул ҳаракатлари, масъулиятсизлиги сабаб Ички ишлар вазирининг айрим меъёрий буйруғи талабларини бузгани учун Ўзбекистон Президентининг 2017 йил 29 ноябрдаги ПҚ-3413-сон қарори билан тасдиқланган «Ички ишлар органларида хизматни ўташ тартиби тўғрисидаги низом»нинг 144-банди, «к» кичик бандига (ички ишлар органи ходимининг шаънига путур етказувчи хатти-ҳаракатлар содир этиши) мувофиқ ички ишлар органларидан бўшатилган.

Шунингдек, ушбу ходимнинг бевосита командирлари интизомий жазоланиши бўйича хулоса қилинган.