Бухоро вилоятининг Пешку туманидаги «Навбаҳор» маҳалласида яшовчи 24 ёшли фуқаро Н.З. ҳамда Тошкент шаҳрида истиқомат қилувчи М.Б.лар фуқарони Миллий гвардияга ишга қўйиш эвазига пора олаётган вақтда қўлга олинди, дея хабар берди «Дарё» мухбири.
Таъкидланишича, ҳолат вилоят ҳуқуқни муҳофаза қилиш идоралари ҳамкорлигида ўтказилган тадбирда фош этилган.
Тайинли иши бўлмаган Н.З. фуқаро Ч.Р.нинг ишончига кириб, ваколатли танишлари орқали уни 2100 доллар эвазига Миллий гвардия тизимига ишга жойлаштиришни ваъда қилган. Ва у Бухоро шаҳридаги «Гранд Бухоро» меҳмонхонаси олдида кимёвий ишлов берилган 1700 долларни олган вақтида ашёвий далиллар билан қўлга олинган.
Ҳолат юзасидан ҳуқуқ-тартибот идоралари томонидан олиб борилган суриштирув-тергов ҳаракатлари давомида Н.З. ушбу пулларни Тошкент шаҳрида истиқомат қилувчи М.Б. исмли шахсга етказиши лозимлиги ҳақида кўрсатма берган. Унинг кўрсатмаси асосида ҳуқуқ-тартибот органлари томонидан тезкор тадбир давом эттирилган. Тадбирда Н.З. фуқаро М.Б.га телефон орқали ўзга бир шахсни Миллий гвардияга ишга жойлаштириш эвазига пул ундиргани ва бу пулларни унга етказиши ҳақида билдирган. Тошкент шаҳар, Чилонзор туманидаги «Бухоро—Тошкент» йўналиши бўйича ҳаракатланувчи автомашиналар тураргоҳида М.Б. исмли шахс кимёвий ишлов берилган 2000 долларни олаётган вақтида ушланган.
Ҳозирда Н.З. ҳамда М.Б. ларга нисбатан Жиноят кодексининг 168-моддаси (фирибгарлик) 2-қисми «б» банди билан жиноят иши қўзғатилиб, дастлабки тергов ҳаракатлари олиб борилмоқда.
