Телекоммуникация соҳаси ходимлари мукофотланди

Ўзбекистон Республикаси мустақиллигининг 30 йиллик юбилейи арафасида мамлакатнинг телекоммуникация соҳаси ишчилари ҳам давлат мукофотлари, эсдалик нишонлари билан рағбатлантирилди.

Бугун Республикада ахборот-коммуникация технологияларини жорий этиш ва аҳоли турмуш даражасини барқарор ошириб бориш учун шароитлар яратишга алоҳида эътибор қаратилмоқда. Бу масалаларни амалга оширишда алоқа йўналиши ходимларининг ҳиссаси катта.

Ахборот технологиялари ва коммуникацияларини ривожлантириш вазирлиги томонидан тантанали маросим 29 август куни видеоанжуман форматида ўтказилди.

Асосий тадбир Муҳаммад ал-Хоразмий номидаги АКТни чуқурлаштириб ўтишга ихтисослаштирилган мактабда бўлиб ўтди. Барча ҳудудлар ва соҳанинг йирик бўлинмалари билан ўрнатилган видеоалоқада Ахборот технологиялари ва коммуникацияларини ривожлантириш вазири Шуҳрат Содиқов соҳанинг барча ишчиларини чин юракдан муборакбод этди.

Соҳа ходимлари Ўзбекистон Республикаси Президентининг давлат мукофотларига лойиқ кўрилди, «Ўзбекистоннинг 30 йиллиги» эсдалик нишони, шунингдек, фахрий ёрлиқлар, «Моҳир алоқачи», «Ўз касбининг устаси» фахрий унвонлари билан тақдирланди.

Мукофотланганлар орасида «Coscom» МЧЖ (Ucell савдо белгиси)нинг уч нафар ходими ҳам бор:

• Владимир Владимирович Кравченко, «Coscom» МЧЖ бош директори;
• Габдураҳманов Дмитрий Валиджанович, уланиш тармоғини ривожлантириш бўлими бошлиғи;
• Ғуломов Аҳмаджон Иброҳимович, ҳудудий бош муҳандис.

Аҳмаджон Ғуломов, ҳудудий бош муҳандис:

«Бугунги эсдалик нишон фақат менинг хизматим эмас, бутун жамоамиз ғалабасидир. Биз келгусида ҳам мамлакатнинг телекоммуникация соҳасини ривожлантиришда давом этамиз. Фурсатдан фойдаланиб, барча юртдошларимизни кириб келаётган байрам билан табрикламоқчиман».

Дмитрий Валиджанович Габдураҳманов, уланиш тармоғини ривожлантириш бўлими бошлиғи:

«Мен Ucell компаниясида 1997 йилдан буён ишлайман. Мустақилликнинг 30 йиллиги муносабати билан менга эсдалик нишон тақдим этишларини эшитиб жуда хурсанд бўлдим. Бизга билдираётган ишончи ҳамда телекоммуникация соҳасини ривожлантиришга қўшаётган ҳиссамизни муносиб баҳолагани учун мамлакатимиз раҳбариятига миннатдорчилик билдираман».

Барчани муносиб мукофотлар билан табриклаймиз ва келгусида касбий муваффақият, соғлик ва фаровонлик тилаймиз!

Реклама ҳуқуқи асосида.