Forbes Россиядаги ижтимоий ва экологик муаммоларга катта маблағ йўналтирадиган инвесторларнинг биринчи рейтингини тузиб чиқди, деб хабар беради Esquire.
Forbes рўйхатни тузишда «Россиянинг энг бадавлат 200 бизнесмени» рейтингидан ўрин олган 31 кишининг 2010 йилдан буён хайрия, ижтимоий лойиҳалар, табиат муҳофазасига сарфлаган харажатларини ҳисоблаб чиққан.
Мазкур рейтингга Россиянинг собиқ алоқа вазири ва Yota собиқ директори Денис Свердлов бошчилик қилди. Нашрнинг ҳисоб-китобларига кўра, Свердлов 2010 йилдан буён хайрия, ижтимоий ва экологик лойиҳаларга 5,65 миллиард доллардан ортиқ маблағ сарфлаган. Шунингдек, таъкидланишича, у Arrival тижорий электрокарларини ишлаб чиқариш бўйича «мутлақо яшил» компанияга асос солган.
Свердловдан ташқари, топ-10 рўйхатдан қуйидаги тадбиркорлар ҳам ўрин олган:
- USM Holdings раҳбари Алишер Усмонов — 2,99 миллиард доллар;
- «Ренова» директорлар кенгаши раиси Виктор Векселберг — 2,53 миллиард доллар;
- «НЛМК»нинг асосий акциядори Владимир Лисин — 2,42 миллиард доллар;
- «Челси» футбол клуби ва Millhouse инвестиция компанияси эгаси Роман Абрамович — 2,23 миллиард доллар;
- Сибир кўмир-энергетика ва «ЕвроХим» компаниялари эгаси Андрей Мелниченко — 2,02 миллиард доллар;
- En+ холдинги асосчиси ва унинг шерикликдаги эгаси Олег Дерипаска — 1,94 миллиард доллар;
- «Норникель» президенти Владимир Потанин — 1,86 миллиард доллар;
- «Северстал»нинг асосий акциядори Алексей Мордашов — 1,75 миллиард доллар;
- «Лукойл» президенти Вагит Алекперов — 1,16 миллиард доллар.
Аввалроқ Forbes 2020 йилда Алишер Усмоновнинг бойлиги 5 миллиард долларга ортганини маълум қилган эди. USM Holdings компаниясининг асосчиси ва асосий акциядори дунё миллиардерлари рўйхатида 99, россиялик миллиардерлари рўйхатида еттинчи ўринни эгаллаганди.
Изоҳ (0)